Amanhá, terça-feira 30 de outubro ás 12:00, convocaam umha concentraçom ao pé da sucursal do BBVA de Conjo, na Praça da Mercede, em apoio a um vizinho de Compostelám e a súa familia ameaçados de desalojo pola entidade bancária.

Segundo informam ao Diário Liberdade as pessoas convocantes "segunda-feira da semana passada iniciamos o contato com o banco na procura de umha soluçom para esta família". Apesar de que inicialmente o BBVA aceitou por-se em contato com elas, umha semana depois ainda nom o fijo.

Exigem a daçom em pagamento para esta "e milhares de famílias mais". A 'daçom em pagamento' consiste em que a entrega ao banco da vivenda sobre a qual pesa a dívida cancela automaticamente a dita dívida. Porém, a legislaçom de excepçom vigente no Estado espanhol fai com que, contra toda lógica, o banco poda expropriar a sua vivenda à pessoa devedora e, ainda, continuar a exigir o pagamento dessa dívida.

"Mais umha vez, os bancos nom estám pola negociar com as pessoas e famílias e preferem botá-las à rua deixando-lhes a dívida de por vida" -frisam as pessoas que convocam o protesto.

Em Ferrol conseguiu-se deter despejo

Há poucos dias a firmeza das e dos manifestantes conseguiu paralisar o despejo de umha família em Ferrol. Naquele caso, um casal e a sua filha de 8 anos iam ser despejados da sua vivenda após a denúncia do banco, dando-se a circunstáncia de que a meninha sofre umha doença grave no rim e requer tratamento médico que os pais quase nom conseguem afrontar economicamente, ao ter uns rendimentos de apenas 180 euros por parte dos serviços sociais públicos.

Foto: Susete - Concentraçom em Ferrol para paralisar um despejo hipotecário.