Tal como acontece em diferentes municípios e comarcas da Europa central, ativistas da Galiza querem pôr em circulaçom umha moeda alternativa ao Euro. Promovida pola Mancomunidade Integral Galega (Miga), está convocada umha reuniom para dia 6 de abril (sábado) no CS do Pichel, em Compostela, à que se convoca em regime aberto a todas as pessoas interessadas.
"A crise do capitalismo está a pôr em questom as bases mesmas do regime económico que padecemos" justificam da Miga. "O Euro continua, apesar de todo, servindo de intermediário obrigado para todos os intercámbios entre as pessoas. Mas isso começa a mudar. Na Galiza, ao igual que no resto do mundo, as populaçons estám recuperando as velhas formas de cooperaçom nom monetária e levantando alternativas eficazes à tirania dos bancos centrais e as suas moedas de curso legal. Moedas sociais locais e complementares, bancos detempo, mercados de troco... as inicativas para a superaçom do sistemamonetário som variadas, criativas e cada vez mais estendidas" mas "falta ainda um sistema de intercámbio integrador que dê corpo maciço a esta economia social puxante" que permita ultrapassar o quadro capitalista.
A reuniom celebrará-se o sábado 6 de abril às 16:00 no centro social O Pichel, sito na rua Santa Clara de Santiago de Compostela. Nom será umha conferência, um debate público ou umha jornada, senom um encontro de espírito prático do que se espera a saída de um rascunho de intercámbios comunitários de ámbito galego.
Por isso, da Miga encorajam "a quem tenha ideias concretas, formaçom no tema ou vontade de envolver-se como ativista" nesta iniciativa a que participe na reuniom já que "umha proposta tam importante e tam enorme pola sua vocaçom nom pode sair de umha única entidade, senom que deve reunir as forças, as energias, as inteligências e as paixons de todas aquelas pessoas e coletivos que estejam a trabalhar já neste caminho, ou que ansiem achegar o seu grao de areia a ele".
Outros casos: o Galeuro
Embora pouco presentes nos meios de massas da Europa ocidental, os casos de moedas sociais ou locais de circulaçom paralela ao Euro som numerosos. Mesmo na Galiza, onde já existe em formato electrónico o Galeuro.
Entre os mais recentes figura o Eusko, a moeda social basca que começou a funcionar a 1 de janeiro deste ano em Iparralde (o País Basco sob dominaçom francesa), com 126.000 notas. Outras moedas sociais ou locais alternativas ao Euro que funcionam no nosso ámbito geográfico som os ecos, as moras, os turutas... implantadas nos Países Cataláns, na Andaluzia ou em Castela.
Na Galiza, o Galeuro, cujo órgao de governo é a AC Filhos da Galiza, tem por enquanto caráter puramente virtual e electrónico, e permite realizar pagamentos a pessoas e estabelecimentos aderidos à rede dos galeuros, que som por enquanto escassos. No entanto, a AC Filhos Galiza prevé, numha segunda fase, a sua impressom física para facilitar "a socializaçom" da moeda.
Foto: EITB - Euskos