Hoxe, o novo réxime 'redefinido', crea a posibilidade legal, por medio dun decreto, de reducir a capacidade de decisión dos propietarios sobre o monte, e non para beneficio común, como sería o desexable, senón para beneficio das empresas que se adhiran á xestión, e todo con cartos públicos.

As SOFOR serán sociedades de xestión forestal que substitúan ás antigas UXFOR, creadas polo bipartido. A diferenza das derrogadas, as SOFOR van supor, por unha parte, un aumento da presión fiscal sobre so propietarios que decidan unificar os seus terreos para facer unha xestións conxunta e, consecuentemente, unha maior complexidade para a súa creación e administración. Por outra banda, ábrese a posibilidade de que empresas privadas, alleas á propiedade do terreo, podan facerse cargo das superficies, cunha concesión de duración mínima de 25 anos, e con participación no consello de administración da sociedade, de até o 49% en función do capital social aportado, pasando a decidir todo ou case todo sobre as posibilidades reais do monte. Isto último, deixaría a propiedade en mans das devanditas empresas. Non propiedade legal, pero si real das superficies.

A maiores, o decreto das SOFOR, considera tan só un tipo de aproveitamento a curto prazo do monte. Cando menos iso será o subvencionable. Anulando as posibilidades de diversificar as producións. Despois de anos de goberno Fraga, coñecemos xa cales son tales aproveitamentos a curto prazo, xa que o monocultivo de eucalipto para celulosas é máis que evidente no noso país.

Trátase, como conclusión, xa non dun sistema que actualiza a era Fraga, senón que retrocede aínda máis e retoma as vellas ideas do franquismo.