Um acontecimento inédito nom só pola novidade desta unidade mas também polos termos em que é convocada, pois com um caráter nitidamente feminista e anti-capitalista, reclamará a Independência para a Galiza.
A nova foi acolhida com entusiasmo por aquelas/es que interpretam esta convocatória como um importante passo para um processo de unidade de açom entre as forças do amplo espectro do independentismo e soberanismo de esquerdas; por outras/os acolhido com cepticismo por nom acreditar na continuidade deste tipo de iniciativas e ver esta como um facto isolado e sem transcendência real para o fortalecimento do nacionalismo galego. Seja como for, o certo é que por acima do entusiasmo (ou nom), dumha possível continuidade (ou nom), há quem vemos esta manifestaçom como umha necessidade real dado o contexto de grave ofensiva espanholista, neoliberal e patriarcal que sofre o nosso povo, e de maneira especialmente particular, a juventude.
Nom pretendo aqui reproduzir as análises que provam a precária situaçom que padecemos, e que muitas leitoras/es deste jornal de seguro conheçam bem melhor do que eu, mas sim acho importante reflectir naqueles problemas concretos que constituem condiçons objetivas determinantes para que umha convocatória deste tipo logre coalhar no seio dum movimento juvenil particularmente atomizado.
Primeiramente, referimo-nos ao desemprego estrutural e a consequente emigraçom massiva como um dos problemas que mais preocupa e afeta à mocidade galega. A imposiçom do capitalismo no nosso país está a ter como consequência nom só a evidente exploraçom da maioria social mas também umha grave crise demográfica que está a hipotecar a nossa sobrevivência como povo. Assim, olhamos com pavor como na Galiza se está a normalizar a ideia da emigraçom/fugida ante a miséria e se está a acolher esta via com preocupante resignaçom entre a juventude.
As jovens enfrentamo-nos aliás à perda das já limitadas capacidades para decidir sobre o nosso corpo e vemos como o governo espanhol dá passos para clandestinizar a decisom sobre a maternidade e colocar-nos no rol submisso de cuidadoras do lar e de crianças.
Nom menos importante é a grave ofensiva espanholista que abrangendo a prática totalidade dos ámbitos e adquirindo maiores dimensons, se materializa de forma mui evidente na LOMCE ou na desmedida repressom que sofre o independentismo galego.
Em síntese, o inimigo bate cada vez com mais força sendo necessário um rearmamento que em indiscutível chave soberanista, feminista e anti-capitalista plante cara a estas agressons. É por isso que num momento em que o regime padece dum enorme descrédito e desafecto popular, resulta decisivo colocar entre a juventude galega a ideia da Independência como requisito sine qua non para um futuro emancipado. Revela-se assim necessária a criaçom de espaços de luita unitários que desde o respeito à pluralidade, nos permitam reforçar o movimento juvenil galego e avançar na imprescindível acumulaçom de forças.
Espero e desejo polo tanto, que esta manifestaçom nom fique num facto isolado pois as que desde um início apostamos por impulsar este "24J unitário", reiteramos a necessidade de afondar no diálogo e a unidade de açom entre a juventude da esquerda independentista e soberanista.
(Artigo publicado no número 128 do Novas da Galiza)