Segundo o relato da Fiscalia, durante a jornada de greve o acusado portava um saco com umha bomba caseira quando foi detido por três polícias espanhóis à paisana. Porém, 'Alfon' negou em todo momento as acusaçons e declarou que fôrom os polícias os que lhe mostrarom o saco com o engenho e ameaçarom com imputar-lhe tenência de explosivos se nom identificava membros de grupos antifascistas como os Bukaneros (torcida da equipa madrilena 'Rayo Vallecano'). Aliás, o seu advogado, Erlantz Ibarrondo, afirmou que a acusaçom nom apresentou nengumha prova objetiva, apesar dos três registros ao domicílio do acusado, e que houvo várias contradiçons nos testemunhos da polícia. 

Contudo, os magistrados finalmente assumirom como verdadeira a versom apresentada pola Fiscalia, mas a petiçom de condena foi rebaixada de 5 anos e 6 meses a 4 anos. A defesa já anunciou que recorrerá a sentença.

'Alfon' foi detido em 14 de novembro de 2012 quando se dirigia a um piquete, foi acusado de tenência de explosivos e enviado à prisom de Soto del Real (Madrid), onde permaneceu até 9 de janeiro de 2013 por 'alarma social' e suposta vinculaçom com 'banda armada'. Durante todo este tempo, ele e a sua família venhem denunciando publicamente a montagem policial da que está a ser vítima.