A convocatória do Aberri Eguna será a primeira actividade conjunta do colectivo apresentado hoje em Donostia.
Reproduzimos a seguir a declaraçom feita pública no acto de apresentaçom.
Declaraçom ari gara
Estamos em marcha! Nós, independentistas do século XXI, queremos fazer saber à sociedade basca e a toda a pessoa que puder estar interessada, que estamos a reunir e a organizar as nossas forças para darmos forma a umha nova iniciativa. Queremos deixar claro que já temos posto o motor em marcha, que temos um horizonte claro e que nos próximos meses desenvolveremos um processo participativo para criarmos e darmos a conhecer este movimento.
Vamos pôr em andamento um movimento com forma de rede baseado na participaçom. Um ámbito composto por pessoas, um movimento independente, que estará fora do jogo dos partidos e a concorrência eleitoral, plural, que dará prioridade àquilo que nos une, um movimento que preserve a identidade, cultura e pensamentos da cada qual.
Porque no-lo pediu o nosso povo! Queremos difundir aos quatro ventos que é umha exigência de nosso povo, que é um desejo de nosso povo o que está por trás deste esforço. Isso, e nada mais que isso, é o que nos mobiliza. As pessoas reunidas nesta iniciativa nom seguimos ordens de ninguém, nom estamos a cumprir a suposta vontade de ETA, mas nom consentiremos a utilizaçom da desculpa de ETA, para obstaculizar a criaçom de um movimento independentista plural e amplo.
Porque a independência é a melhor opçom para Euskal Herria. Levaremos a reivindicaçom da independência a todos os cantos do nosso povo, porque esta é a via mais directa para garantirmos a nossa identidade nacional, a nossa cultura, a nossa língua, a nossa economia, o avanço da nossa sociedade e o equilíbrio com o meio natural. Porque efectivamente, a cidadania basca, tal como o resto de habitantes do mundo, tem direito a ser soberana e, exercendo esse direito, queremos criar o nosso próprio Estado, já que esta é a melhor maneira de vivermos em liberdade no mundo.
Baseados na democracia, por vias democráticas, para que o nosso Povo decida democraticamente. Consoante a Declaraçom Universal de Direitos Humanos, aprovada pela Assembleia Geral das Naçons Unidas a 10 de Dezembro de 1948, e o Pacto Internacional de Direitos Civis e Políticos, apostamos em vias, práticas e espaços de decisom de carácter democrático. Pedimos o mesmo a quem defende outros modelos nacionais para Euskal Herria, isto é, que aceitem que é a sociedade o único sujeito da tomada de decisons.
Somos conscientes de que hoje em dia as legislaçons espanhola e francesa impedem optar pola independência. Portanto, trabalharemos junto a quem apostar noutras opçons diferentes à independentista, a favor de um cenário democrático, que garanta o reconhecimento de Euskal Herria, o respeito à sua territorialidade e o direito de autodeterminaçom, entendendo-o como um passo necessário no caminho da consecuçom da independência.
Primeira iniciativa: Aberri Eguna. Queremos dar a conhecer que começamos a trabalhar no apelo de cara ao dia 4 de Abril, Aberri Eguna, quer dizer, o Dia da Naçom Basca, para levar à rua esta reivindicaçom entre todos e todas as independentistas, e o comemorarmos conjuntamente.
Donostia, 27 de Fevereiro de 2010