Imagem: Revoluçom (Batalha nas barricadas), de Ludwig Meidner, Óleo sobre tela, 1912.
Umha vez consumidos os 365 dias de 2011, sabemos que a tendência do capitalismo mundial tem natureza autodestrutiva para o ser humano e que a sua atual crise terminal, longe de implicar automaticamente a sua superaçom a caminho de um sistema mais justo, tem no seu interior a barbárie anunciada por Rosa Luxemburgo a inícios do século XX.
Só a extensom e radicalizaçom das luitas sociais com umha perspetiva revolucionária, nos contextos nacionais e mundial, poderá garantir a imprescindível derrota do capitalismo e a construçom de um sistema mais humano, justo e igualitário, que garanta a liberdade das pessoas e dos povos, que enterre de vez os privilégios e a violência estrutural que definem o obsoleto modo de produçom capitalista.
Como parte de mais umha frente dessa luita, a informativa, o Diário Liberdade transmite saudaçons a todos os seus leitores e leitoras, encorajando-as a colaborarem na construçom coletiva deste espaço de contra-poder na comunicaçom horizontal e alternativa, por cima de quaisquer divisons e sectarismos. Sabemos que existem diretrizes por parte do brutal e antidemocrático Estado espanhol para destruir os espaços de comunicaçom construídos à margem dos seus centros de poder, e que essa ameaça paira desde o primeiro dia em que saímos ao ar sobre o Diário Liberdade, iniciativa do bravo povo galego com a adesom solidária de camaradas internacionalistas dos irmaos povos de Portugal e do Brasil.
O único antídoto contra essa ameaça é o reforçamento da cobertura popular, o apoio de cada vez mais leitores, leitoras, colaboradores e colaboradoras, fortalecendo esta ferramenta de luita informativa em que participam cada vez mais companheiros e companheiras. Cada leitor, cada leitora, deve conseguir que novos leitores e leitoras se somem e quem tiver possibilidade deverá passar a ser um novo colaborador ou colaboradora nesta trincheira da comunicaçom popular revolucionária. Também a ajuda económica é imprescindível para mantermos e melhorarmos o projeto. Somos um projeto do povo e precisamos do sustento económico do povo, a quem servimos.
Esse é o caminho. Tal como tem sido até hoje, o Diário Liberdade porá em 2012 todo o seu esforço militante ao serviço da causa da revoluçom e da soberania dos povos, contra o capitalismo e o imperialismo.
Força e avante, por um 2012 de luitas revolucionárias!