A proximidade do dia da visita do líder católico à capital galega precipita as actuaçons repressivas arbitrárias por parte da Polícia espanhola contra vizinhos e vizinhas de Compostela.

Concretamente, no bairro compostelano de Sam Lázaro estám a produzir-se invasons de vivendas sem ordens judiciais por parte de membros da Polícia espanhola, que realiza registos ilegais com total impunidade. Além disso, o MpDC afirma que os polícias pressionam algumhas das centenas de pessoas que penduram nas janelas das suas casas bandeiras contra a visita papal.

Por outra parte, o direito de circulaçom está a ser também afectado pola presença abafante e ameaçadora de fardados da força repressiva espanhola na capital da Galiza. A entidade Esculca apresentou alegaçons contra as medidas de segurança impostas com motivo da visita de Ratzinger, por afectarem direitos fundamentais.

Também o colectivo Mulheres Transgredindo, da Rede Feminista Galega, apresentou umha demanda contra Bieito XVI "polos seus delitos de lesa humanidade e apologia do genocídio", exigindo "o ingresso em prisom" de Joseph Ratzinger "polos delitos de tortura, abusos sexuais a menores e encobrimento dos mesmos, apologia da misoginia e homofobia e perseguiçom por motivos políticos, étnicos de género ou de orientaçom sexual".