Desde setembro do ano pasado, a veciñanza destas parroquias ven identificando a eliminación de paradas e a redución da frecuencia das liñas de autobuses que comunican estes núcleos de poboación.
Denuncian que a día de hoxe, teñen que desprazarse máis de 2 Km para acceder ao dito transporte por vías que carecen de beirarrúa, o que supón, ademais dun prexuízo para estes núcleos, un perigo, sobre todo porque moitos dos usuarios e usuarias son persoas maiores e/ou con mobilidade reducida.
Tras cortar a circulación durante aproximadamente unha hora e despois de que efectivos da Policía Nacional ameazaran con identificar e multar as persoas que se estaban a manifestar polo dereito a un servizo municipal básico como é o transporte público, as veciñas e veciños do Son e arrededores deron por concluída a concentración e anunciaron novas mobilizacións para os próximos días.
No comunicado que repartiron entre os medios e persoas solidarias que ata alí se achegaron, defenden que o transporte público colectivo ten que servir para favorecer a vertebración territorial dos núcleos máis afastados do centro urbano, ademais de supor a alternativa máis ecolóxica, económica e solidaria. Remarcan ademais que "A drástica redución do transporte urbano dificulta a xestión diaria da veciñanza á hora de acudir aos postos de traballo, ao mercado, aos centros médicos ... o que pode considerarse un agravio comparativo con outras zonas do concello.
Fotos: CUT