Anova, Chelo Martínez (deputada de AGE no Parlamento de Galiza), BNG, Daniel Rodas (deputado do BNG no Parlamento de Galiza), Causa Galiza, Quique Fernades, Movemento pola Base, Pepe Arias, Nós – Unidade Popular, Anjo Torres Cortiço (responsábel comarcal de Nós-Unidade Popular en Pontevedra) e PCPG, Xosé Collazo (portavoz nacional).
Desde o comezo da crise o discurso neoliberal imperante está a repetir continuamente que para sair da crise e recuperar a economía só se pode facer o que se está a facer e que a alternativa é o desastre e a catástrofe. Este discurso, a través do medo a máis recortes, pretende manternos anestesiad@s mentres o grande capital, tanto financeiro como industrial, está a aproveitar a crise para realizar unha moi profunda reestruturación do capitalismo en favor dos seus intereses.
Mais este non é o único discurso, hai outro de cara máis amábel que pretende implicitamente ou explicitamente "refundar o capitalismo" propoñendo pequenas reformas no sistema que poñan control e regulen a avaricia desmesurada dos neoliberais sen pór en cuestión o propio sistema capitalista.
Ámbolos dous discursos parecen obviar premeditadamente que as crises son consustanciais ao sistema, que estas son cíclicas e no capitalismo inevitábeis e, é máis, necesarias para o "sano" funcionamento do capitalismo xa que as crises destruen todas as actividades que non son o bastante rentábeis para garantir a supervivencia do sistema. O capitalismo promove, pois, un darwinismo social no que só as empresas máis fortes subsisten e acumulan máis capital.
Con preto de 300.000 desempregad@s condenados a emigración, un 64% dos fogares con dificultades para chegar a fin de mes, con 10.000 familias que perderon a súa vivenda desde o comezo da crise e 5300 máis con risco de perdela no futuro, Galiza está a sofrer en toda a súa crueza as políticas neoliberais dos distintos gobernos.
O final do túnel da crise non parece estar preto e os gobernos, se a cidadanía non o impide, seguirán aplicando as súas receitas neoliberais en forma de máis recortes en servizos públicos, privatizacións, máis precariedade laboral e no caso de Galiza tamén na venda do territorio para a especulación e expoliación dos recursos naturais.
A disconformidade da sociedade con esta situación é crecente como se puxo de manifesto co movemento 15 M, coas folgas xerais convocadas recentemente e coas protestas contra as minas ou os parques eólicos. Estes feitos demostran que o pobo non está durmido, só necesita alternativas a un modelo económico que afoga os de abaixo e enriquece os de arriba. O modelo económico que leva 200 anos oprimindo @s traballadores/as, o capitalismo, cada vez máis insaciábel no seu proceso de acumulación. Un modelo colonial que priva a Galiza de capacidade política para decidir sobre o seu futuro e os seus recursos.
Desde o Colectivo Nacionalista consideramos de grande interese a posta en común de ideas para afrontar esta situación desde Galiza e por iso convidamos a debater e expór as súas propostas a distintas organizacións políticas galegas nun debate baixo o título "Cara onde imos? Propostas e solucións desde Galiza para saírmos da crise" que se celebrará este venres 19 de abril ás 20h na biblioteca municipal de Marín.
Marín, 17 de Abril de 2013.
