No enquanto, ainda nom todos os centros publicárom a sua oferta para estes meses, mas já podemos avançar parte da oferta, que é variada, original, económica e por toda a Galiza.
A seguir, compilamos os cursos anunciados até agora. Muitos deles, ficam pendentes do contato das pessoas interessadas em participar para afixar horários, níveis e preços. Procura a tua aldeia, vila, cidade ou comarca e aprende aquilo que nunca che proporám desde as instituiçons do poder.
Comarca do Eume
- Colectivo Terra, Ponte d’Eume:
Pilates: terças e quintas de 20.30 a 21.30 e de 21.30 a 22.30. Aponta-te no correio do Colectivo Terra ou no 696555997.
Malabares: sexta de 17.00 a 18.00. Aponta-te no correio do Colectivo Terra ou no 606724305.
Clases de pandeireta, birimbau e tarranholas. Aponta-te no nosso correio do Colectivo Terra ou no 620904570.
Comarca de Vigo
- Lume!, Vigo:
Pandeireta: de 19:00 a 20:00 h., sextas-feiras
Gaita: de 18:00 a 19:00 h, terças-feiras
Iniciaçom à Língua Galega: horário por determinar.
Iniciaçom à Informática: horário por determiner.
Defesa pessoal para Mulheres: de 12:00 a 13:30, sábados.
Iniciaçom a Ritmos Latinos: 22:00 a 23:00 h (terças-feiras) e 11:00 a 12:00 h (sábados)
Zumbá: 22:00 a 23:00 h, quintas-feiras.
Matrícula aberta todo o ano. Informa-te! centrosociallume@gmail.com
Fai-te sóci@ do C.S.Lume! e terás o 20% de desconto nos cursos.
- CS A Revolta, Vigo
Começamos este curso com a re-volta de dous dos grandes êxitos da temporada passada. Por umha banda, nas sextas-feiras às 19h30 umhas aulas que fam falar ao mesmíssimo Wenceslao Cabezas e nom deixam indiferente a ninguém, as aulas de dança tradicional!!
Da outra banda, nas quintas-feiras às 20h00, e fazendo de Los Panchos história, as aulas de guitarra!!
Aliás, no próximo mês de outubro darám começo as aulas de pandeiretapara o qual haverá umha juntança a finais deste mês na que se fixará dia e hora, e também em mente temos começar com as aulas de gaita.
Podedes-vos incorporar a qualquer dos grupos quando quiserdes e também propor qualquer outras aulas sempre que vos juntedes um grupinho interessado.
Comarca de Lugo
- Mádia Leva!, Lugo
Desde a terça-feira, dia 4 de setembro voltou o curso de gaita, depois da parada em verao. Às 20h30, às terças-feiras. Também que o curso de pandeireta continua nas quartas-feiras.
Se queres apontar-te a algum dos cursos em andamento ou bem propor que organizar algum envia-nos um mail ou passa polo local.
Comarca de Compostela: o CS do Pichel tem a maior oferta de cursos
A Gentalha do Pichel organiza a oferta mais ampla de atividades polo enquanto. É na capital galega e esta é a oferta detalhada:
Inscriçom de 18 a 29 de Setembro: gentalhadopichel [arroba] gmail.com, no C.S O Pichel (Sta Clara 21 de 18h a 23h) ou no 610669199 de 15h a 18h.
Normas dos cursos: Nom se cobrará matrícula. Cada curso deve ser pago na primeira semana do mês. Pagará-se a totalidade do mês e as aulas perdidas por causa do professorado serám recuperadas. Os descontos afectam as pessoas sócias e aquelas que participarem de mais dum curso (o desconto nos dous casos será de 2€ por curso)
Teatro *horário definitivo por confirmar
Terças feiras de 21h15 a 23h15 ou Sextas feiras de 20h a 22h
Começo 2 de outubro (terça feira) ou 5 de outubro (sexta feira)
Preço por confirmar
Neste obradoiro pretendemos investigar, através dos vários níveis de expressom que oferece o Teatro, o interior e o arredor de cada pessoa que conforme o grupo, assim como a interacçom do mesmo grupo, concluindo com umha representaçom cénica. Trabalharemos basicamente cinco vertentes: a expressom (oral e corporal), a imaginaçom e a criatividade, a comunicaçom, o autoconhecimento e a abordagem cultural. Salientar o carácter lúdico e de dinamizaçom social que implica a prática teatral.
Zé Paredes, o professor, é actor e director de cena dedica-se à actividade profissional do teatro desde o ano 1996. Iniciou a sua formaçom no Porto, no Ballet-Teatro Escola Profissional. Em 2001 estabelece a sua relaçom com o teatro galego, através dumha co-produçom entre o Teatro do Noroeste, a Companhia de Teatro de Braga e o Centro Dramático Galego. Vive na Galiza desde 2002, tendo sido coordenador da Aula de Teatro da Universidade da Corunha e junto con Mónica Camaño cria o projecto Teatro Nu.
Pandeireta Iniciaçom e Aperfeiçoamento
Quartas-feiras. Iniciaçom de 19h a 20h. Aperfeiçoamento de 20h a 21h.
Começo 3 de Outubro.
Preço 14€
Nas aulas aprenderemos a tocar os ritmos básicos da música tradicional galega, mas também faremos exercícios de técnica, de improvisaçom e de acompanhamento a outras músicas que costumamos ouvir.
Aitana Eanes, a professora, está acompanhada pola música tradicional desde 1997. Começou sob a direcçom do mestre Lolete como gaiteira, passando depois por outras agrupaçons como “Airinhos de Fene”. Formou-se em diferentes cursos com Eliseo Parra, Aleix Tobias ou Luis Prego, e tem colaborado em vários trabalhos discográficos e espectáculos.
Desde há dez anos imparte aulas regulares e cursos intensivos na Galiza, na Catalunha (Coetus, escola folque do Pirineu) e Portugal.
Música para peto. Harmónica e mais uns instrumentos miúdos.
Terças feiras de 20h a 21h.
Começo 9 de Outubro.
Preço 15€
Curso para todos os níveis sobre instrumentos que podem ser levados no peto, porque a música é o refúgio onde podermos agochar-nos contra o aborrecimento, a defesa da mediocridade.
Curso para aprender/melhorar a tocar a harmónica em vários estilos (tradicional, folque, popular, blues...) e liçons para outros instrumentos: tarranholas, harpas de boca, assobios, conchas...
O professor será Ariel Ninas (a.k.a. Mauro Sanín) músico polifacético associado à Central Folque, onde desenvolve a sua actividade profissional regular. Ainda que pouca gente o sabe, a harmónica é o seu primeiro instrumento, que toca desde os 14 anos e tivo em Marcos Coll (Reyes el K.O.) o seu professor. Como sanfonista, é membro da OMEGA (Orquestra de Música Espontánea da Galiza) e forma parte de diversos projectos em música experimental.
Baixo eléctrico
Terças feiras de 18h30 a 20h.
Começo 2 de Outubro.
Preço 20€
Para poder chegar a mais gente e também dar um ensino melhor, veremos dous níveis: um primeiro nível elementar, onde conheceremos a técnica básica para podermos fazer soar o baixo com um som bom e achegar-nos à interpretaçom de pequenos ritmos com o nosso instrumento, como também começar a conhecer as escalas e os acordes. Um segundo nível intermédio que pretende uns objectivos mais altos, melhorar a técnica das duas maos e o “slap e popping”, trabalhar as escalas e os acordes com diferentes padrons rítmicos, a criaçom de linhas de baixo e por último a prática de diferentes estilos musicais no baixo eléctrico.
O professor será Alberte Rodríguez, picheleiro de sempre. Estudou contrabaixo no Conservatório Superior de Música da Corunha e na Escola de Altos Estudos Musicais da Galiza, como também baixo eléctrico em Estudio, escola de música e em Aula Combo. Completou sua formaçom com diferentes cursinhos e aulas magistrais (Wolfgang Harrer, Diego Zecharies, N.H. Orsted Pedersen, Ferrán Sala, Fernando Flores…).
Tocou, gravou ou colaborou como baixista ou contrabaixista em muitos grupos, entre eles: Tonhito de Poi e Rasa Loba, Orquestra de Cámara Galega, Emilio Rúa, Orquestra Sinfónica de Melide, Roi Casal, Ophiusa, Bea Porrúa, Silvia Ferre, Embrace Me Ocean e Carmen Dor.
Na actualidade dedica-se ao ensino e à interpretaçom através da participaçom em: PELdeNOZ, CabRaret, Jorgelina Piana Trío, Som do Galpom, Pé de Boi, Kana Kaiana e Super-sandwich.
Canto e Pandeireta
Segundas feiras de 21h15 a 22h15
Começo 1 de outubro.
Preço 14€
As aulas de pandeireta e canto virám da mao de Carme Iglesias, integrante das Pandereteiras Bouba, da Pontragha. As pessoas velhas da comarca, de quem aprendeu a música, estám presentes no seu modo de tocar e ensinar. Desde Tordoia portas para fora... Começa a rota da pandeireta!
*Curso para quem já sabe tocar a pandeireta.
Português
Terças feiras de 20h a 21h.30
Começo 2 de outubro.
Preço 14€.
Duraçom de 4 meses.
Com perto de 272,9 milhons de falantes, o português é a quinta língua mais falada no mundo.
Neste curso vamos aprender aqueles conteúdos gramaticais, socioculturais e lexicais que nos ajudem a comunicar com oito países lusófonos, mas sempre tendo em conta que sermos galegas é uma entrada que favorece o acesso ao mundo em português.
Nascida em Padrom em 1982, Carmen Saborido, é licenciada em Filologia pela USC. Desde 2006 é professora no ensino secundário e EOIs. É tradutora e corretora linguística. Também dá aulas a adultos em diversas associações.
Simultaneia estas atividades com o labor como professora on-line no curso Falarmos Brasil, como conferencista no ateliê divulgador OPS: O Português Simples, e como redatora do blogue de temas lusófonos Lusopatia.wordpress.com.
Jogo do Pau (Arte Marcial Tradicional)
Sábados. Iniciaçom de 12h a 14h.
Começo 6 de outubro
Preço 20€
O Jogo do Pau é umha arte marcial popular originária da Galiza e norte de Portugal. Em Portugal recuperou-se e converteu-se numha arte marcial moderna nos últimos 50 anos. Porém, na Galiza está testemunhada em cantigas e na memória de pessoas vivas que o praticaram na juventude.
Neste curso aprenderemos os movimentos básicos desta arte marcial, tal e como está a ser recolhida da tradiçom oral galega na actualidade. Faremos exercícios básicos de controlo do bastom curto e longo, aprenderemos técnicas de defesa contra vários tipos de ataque e adaptaremos os movimentos tradicionais do pau às armas com que podemos contar no dia-a-dia: guarda-chuvas, jornais, mao vazia...
língua e cultura catalás
Quartas feiras de 19h30 a 21h
Começo 3 de Outubro.
Preço 20€.
Duraçom de 3 meses.
O curso de língua e cultura catalás quer ofertar um conhecimento global da realidade social da língua catalá (extensom territorial, distintos graus de oficialidade, situaçom sociolingüística...) e da cultura que se gerou no seu território. O alunado também adquirirá as ferramentas linguísticas básicas para entender textos escritos ou orais em catalam, de jeito que desenvolva as habilidades comunicativas para poder passar da compreensom da língua ao seu uso activo.
O professor será Eduard del Castillo Velasco, licenciado em Filologia Catalá e Filologia Galega pola Universitat de Barcelona. Dedicou-se à docência da língua catalá e da língua galega, à traduçom literária (catalám-galego) e à correçom. Interessado especialmente nas relaçons entre a Catalunha e a Galiza, procura dá-las a conhecer e fortalecer desde os meios de comunicaçom em que colabora (rádio e imprensa escrita). É membro de Espazos Radiofónicos Galegos em Catalunya (ERGaC) e mantém o blogue “Catalunya a Galícia, a Galiza en Cataluña” (http://galiza-catalunya.blogspot.com/).
gaita *horário definitivo por confirmar
Terças feiras de 20h15 a 21h15 ou de 21h30 a 22h30
Começo 2 de Outubro.
Preço 16€.
No curso fará-se umha aproximaçom à técnica do instrumento e aprenderemos algumhas peças.
O curso irá da iniciaçom ao aperfeiçoamento, trabalhando ouvido, afinaçom e linguagem musical, com as noçons básicas de teoria e leitura aplicadas à prática da música tradicional.
O professor será David Canto Veiga, gaiteiro iniciado na música tradicional na comarca da Marinha, para depois receber formaçom em percussom e requinta e flautas travesseiras em aCentral Folque e no Conservatório. Tem tocado com 'Acibreira' ou 'Quarteto da Gentalha', além de gravar no último disco de Os Cempés.
Pilates
Terças e quintas feiras de 09h a 10h ou de 19h15 a 20h15.
Começo 2 de Outubro.
Preço 20€.
Grupo máximo 12 pessoas
O método Pilates é umha disciplina física que fomenta a concentraçom, o equilíbrio, a correçom postural e o fortalecimento da zona abdominal e lombar. A série de exercícios combinam-se a um ritmo pausado; unha sessom terá entre 50 e 60 minutos. Trabalha-se a este ritmo para poder ser conscientes do que se está a fazer, procurando a coordenaçom de movimentos e o trabalho psicomotor. Esta disciplina abrange um amplo leque de possibilidades, podendo ser praticado por diferentes tipos de pessoas independentemente da idade ou estado físico. O método pode-se adaptar a diferentes necessidades.
Cristina G. Cameselle leva desde 1985 impartindo aulas de ballet clássico, sempre sentiu a necessidade de bailar e de mover-me. A sua formaçom é principalmente de dança clássica; estudou com grandes professoras como Hannelore Gotsclahlk, Carmina Ocaña e finalmente com Carmen Roche. Mas também fijo muitos cursos com grandes bailarinas e coreógrafas de dança contemporánea como Cesc Gelabert, Chevi Muraday ou Teresa Nieta entre outros. Desde 2006 entrou em contacto com o método pilates. Para ela: “foi um passo natural que se complementava com todo o meu trabalho de dança”.
* Necessário levar mantinha e esteira.
Corpo e dança. Sentir o corpo através da dança e de outras técnicas de trabalho corporal
Segundas feiras de 19h a 20h15.
Começo 1 de Outubro.
Preço 25€.
O objectivo do curso é entrar em contacto com o próprio corpo através da dança, da respiraçom, do movimento, do contacto... É um espaço para sentir-nos e deixar que o corpo fale e se expresse, para contactar com o instinto, com as emoçons, com a nossa criatividade e intuiçom; para deixar fluir o nosso ser...
Inés Rodo, depois de 26 anos de formaçom em diferentes estilos e técnicas de dança e de trabalho corporal (dança clássica, contemporânea, técnica Alexander, Pilates, ioga, biodança, bioenergética, movimento autêntico... ), sente a necessidade de compartir o que a ela tanto bem-estar lhe proporcionou a nível de consciência, segurança, contacto e fluidez corporal. Formou-se também em Terapia Gestalt, umha corrente psicoterapêutica que concede enorme importância ao trabalho corporal desde a perspectiva da tomada de consciência, a presença no aqui e agora, o relacional e a responsabilidade.
* Conveniente levar mantinha ou esteira
Dança tradicional para quem nom sabe nada *horário provisional
Terças Feiras de 20h30 a 21h30 ou Quartas feiras de 20h a 21h
Começo 2 de Outubro (terça feira) ou 4 de outubro (quarta feira)
Preço 15€
Impartido por Chus Caramés, que leva décadas no baile galego. Começa na sua terra natal para retomar na nossa comarca num grupo de baile da cidade, e continuar a dia de hoje reaprendendo em festas e foliadas. Além de bailadora e pandeireteira, é a organizadora dum evento muito importante para a musica tradicional do país, os “Encontros de Música Tradicional de Carvoeiro".
Dança tradicional para quem sabe um chisco *horário provisional
Quartas feiras de 20h a 21h ou Segundas Feiras de 21h15 a 22h15
Começo 1 de outubro (segunda feira) ou 3 de Outubro (quarta feira).
Preço 15€
Se já foste um aninho a dança e mais ou menos lembras o básico, este é o curso onde afiançarás o aprendido e darás umha volta para continuar a desfrutar das festas. Quem te ajudará é umha rapariga que sabe de troulas e foliadas.
Carme Campo aprendeu os primeiros pontos no Porrinho, aperfeiçoou-nos num grupo de Compostela e agora mantém-se aprendendo no dia a dia em seráns e festivais de música tradicional.
Dança tradicional para quem sabe algo mais
Segundas feiras de 20h15 a 21h15.
Começo 1 de Outubro.
Preço 15€
Neste curso aprenderemos alguns bailes de diferentes zonas para podermos continuar a participar activamente em festas e foliadas.
Fuensanta Nieto há mais de vinte anos que baila em diferentes agrupaçons folclóricas da comarca compostelana. fijo algum trabalho de campo por diferentes lugares da Galiza para aprender, de primeira mao, as diferentes maneiras de bailar dos e das nossas velhas.
Tea & sympathy. Curso de língua inglesa e culturas anglófonas.
Segundas feiras de 19h a 20h Nível Intermédio I; de 20h a 21h: nível Intermédio II. Quintas 19h a 20 h. Nível Aperfeiçoamento.
Começo 1 de Outubro para Intermédio, 4 de outubro para aperfeiçoamento.
Preço 20 euros
Duraçom até Junho
Curso de inglês para aquelas pessoas que tendo um certo nível adquirido (de intermédio a avançado) desejam praticar e desenvolver as suas competências orais e também enriquecerem o vocabulário necessário para diferentes situaçons e contextos através de actividades com um alto grau participativo, fomentando a implicaçom dos e das participantes num ambiente positivo e aberto.
Será impartido por Alfonso Barata,que como docente em língua inglesa conta com experiência no Reino Unido e na França.
Percussom Brasileira e Latina
Segundas feiras de 21h30 a 23h.
Começo o 1 de outubro
Preço 27 euros
No curso de percussom brasileira e latina serám ensinados ritmos de Brasil e alguns ritmos afrocubanos. Serám ultizados também alguns dos instrumentos típicos de cada ritmo. Desenvolveram-se actividades preparatórias para a compreensom musical e motora dos ritmos.
Paulo Silva, Natural de Salvador da Bahia, Brasil, cursou estudos na Facultade de Música da Universidade Federal de Bahia (UFBA) durante onze anos, quatro deles cursando estudos superiores. Durante oito anos tocou como convidado na Banda de Música e a Orquestra Sinfónica da Universidade. Também tem umha ampla experiência em música de cámara clássica e contemporânea.
Colaborou com vários artistas de Salvador de Bahia tanto de bateria como em percussom, abarcando diferentes estilos como samba, afrobrasileiro, rock, soul, funk e música étnica (World Music). Na Galiza,onde vive há quatro anos tem colaborado, gravado e partilhado gravaçons e/ou actuaçons e participaçons em directo ao lado de artistas como Xosé Manuel Budiño, Guadi Galego, Uxía Senlle, Sonia Lebedinsky, Carlos Blanco, Quico Cadaval, Antón Reixa, Sergio Tannus, Narf,Fred Martins, Najla Shami, Diana Tarin, Narci Rodríguez, Issac Palacín, Marcos Teira, Margareth Menezes, Maria Manuela, Edelmiro Fernández, Carlos Castro, Kepa Junkera, Mercedes Peón, Quiné, Xoél López, Emilio Rúa, Bakin´ Blues Band, Aline Frazao, La Otra Banda, O Som do Galpóm, Antonio Zambujo, Odaiko, Óscar Ibanéz, Xoán Curiel, Kana Kaiana, Veronica Valois , Jamila Purofilin e Débora Silva.
Fotografia
Horário por decidir na reuniom de terça feira 2 de outubro às 20h30.
Preço 15 euros
Duraçom de 3 meses. De outubro a dezembro
Mediante o curso pretende-se que o alunado tire o máximo proveito das suas cámaras, sejam compactas ou reflex, treinando o uso de todas as suas funçons assim como aprendendo os fundamentos básicos da fotografia, para desenvolver as suas potencialidades artísticas. Além disso, comentaremos os referentes históricos e artísticos necessários para compreender a importáncia histórica da fotografia na nossa sociedade.
A professora será Rute André, apaixonada pola fotografia, que entende a arte como um exercício de lógica intelectual e análise, interessando-se pola funcionalidade e a racionalidade construtiva: a fotógrafa passa a ser umha engenheira visual ao serviço da sociedade.
Permaneceremos atentas e atentos às novidades nos centros sociais sobre cujas atividades permanentes e cursos ainda nom chegou informaçom, e convidamos os coletivos que encontrarem qualquer ausência nesta listagem a escrever para o Diário Liberdade informando sobre as atividades permanentes e cursos que preparam.
Foto: CS A Revolta
