As entradas xa están á venda en:
https://taquilla.servinova.com/entradas/main.php?Nivel=Evento&idRecinto=34&idEvento=3856
A Ultranoite colle as maletas para trasladarse por primeira vez ata A Coruña. Despois da decisión de Feijoo, será en plena campaña electoral. E será a taquilla e co IVE das entradas disparado (é dicir, os artistas cobrarán en función das entradas que se vendan). Pero a Ultranoite, vendo o rápido que se desmorona o noso Estado do Benestar, quere achegarse ao público doutras cidades e comarcas para compartir esta práctica de autodeterminación teatral co maior número de xente posible.
Coma sempre, a Ultranoite transporta música ao vivo, humor irreverente, teatro feito a pé de rúa, onde a espontaneidade e a improvisación faise con alevosía e nocturnidade. Un cabaré distinto, actual, crítico, gamberro e incorrecto. Unha revista ao vivo para repasar a actualidade con toda liberdade.
Un espectáculo que conta coa participación de 12 artistas sobre o escenario. Todo un luxo nos tempos que corren. Actores e actrices con moitas táboas e moito humor como Miguel de Lira, Patricia de Lorenzo, Manuel Cortés, Mónica García. Figuras singulares da escena galega como Carlos Santiago. E músicos tan solventes como Xacobe Martínez Antelo, Max Gómez e Manuel Cebrián. Haberá novas incorporacións segundo se achegue a data.
A Ultranoite ademais ofrece un formato de espectáculo distinto ao público, que poderá sentar nunha mesa e tomar unha copa mentres goza dos distintos skecthes, convertindo o Fórum Metropolitano nun clube ao máis puro estilo berlinés.
E aínda que a Ultranoite faise sobre a marcha para apurar os temas do día a día, xa se está a traballar en novos números que se presentarán na Coruña. Falarase da subida do IVE, de Sanchez Gordillo e os asaltos aos supermercados, da segregación por sexos nas escolas, do roubo do Códice e das inexploradas relacións entre o Deán e o electricista da catedral, das touradas, de María Pita e Alfonso Molina, das Pussy Riot e das Cándidas Católicas Coruñesas. E por suposto, contaremos coa presencia dos nosos tertulianos mais veteranos, don Mariano e Juancar.
Se queres ser cómplice do humor máis gamberro do teatro galego e español, non podes perder esta Ultranoite na Coruña!
Foto: Grupo Chévere