A plataforma de pessoas afetadas pola estafa das preferentes da bisbarra do Salnês protagonizarom esta terça-feira mais umha açom reivindicativa, quadrando com a primeira etapa da Vuelta Ciclista que pasava pola Galiza.

O objetivo era fazer visível a sua causa e procurar o apoio público do único corredor galego nesta competiçom, Gustavo César Veloso, de Vila Garcia. E conseguírom-no: ao remate da etapa, Veloso mostrou a sua solidariedade com as 45 mil pessoas estafadas por Novagalicia Banco --em total, as pessoas afetadas som ao redor de 100 mil--.

"Para Feijóo somos um estorbo muito grande", declarou perante os meios de comunicaçom o porta-voz da plataforma, Argimiro Martins, que quijo lembrar ao presidente da Junta que, com umhas eleiçons que decorrem a 21 de outubro, que "nom som 50, senom 50 mil em toda a Galiza, e se se somam as familias, até 300 mil os votos que estám em jogo".

O coletivo acedeu a umha vivenda de um edifício detrás da zona da organizaçom e colocárom numha varanda umha faixa que dizia 'Plataforma Salnés, preferentes e subordinadas, soluçom'. A açom das pessoas afetadas rematou com umha marcha a pé até Porto Novo. Na segunda etapa da Vuelta na Galiza, entre Cambados e Ponte Vedra, haverá protestos durante a subida ao Monte Castrove, onde a marcha dos ciclistas transcorrerá mais lenta.