Os três que declarárom hoje denunciárom que a Guarda Civil recorreu aos maus tratos psicológicos durante o tempo de isolamento e interrogatório que se seguiu à detençom dos três.

Segundo Galizalivre, Diego e Xurxo terám acabado por assinar declaraçons autoinculpatórias precisamente devido às alegadas torturas psicológicas, à 1 da madrugada da quarta-feira, pouco antes de serem conduzidos perante o juiz.

Já diante de Pablo Ruz,Xurxo negou-se a declarar, enquanto Diego se declarou inocente. O terceiro detido que hoje passou a disposiçom judicial, Héctor, nom declarou nem diante da polícia nem diante do juiz.

Galizalivre informa da abertura de umha investigaçom por parte do juiz a partir das denúncias de torturas, se bem a defesa dos detidos terá afirmado que existem "poucas esperanças" sobre umha resoluçom positiva dos factos, já que os supostos torturadores terám atuado "sempre com o rosto coberto com passamontanhas".

Finalmente, Diego e Héctor, como Carlos no dia anterior, dérom entrada na cadeia de Soto del Real, enquanto Xurxo, menor de 21 anos, foi conduzido para a de Alcalá-Meco, única das duas com módulo para menores, todas elas na Comunidade Autónoma de Madrid.

Para amanhá, quinta-feira, foi convocada umha manifestaçom em Compostela pola entidade antirrepressiva Ceivar.