Quanto ao ámbito continental, o Conselho da Europa, que reiteradamente tem criticado a falta de iniciativas positivas para o galego e a orientaçom política aplicada polo PP em matéria de língua, voltou a reclamar "proteçom" para o galego, cujo futuro está em grave risco, segundo diferentes estudos de ámbito nom governamental e internacional.
Concretamente, a instituiçom europeia critica a reduçom do galego no ensino "em todos os níveis", bem como da sua estrutura de apoio. Deteta também o Conselho da Europa umha clara falta de diálogo da Junta da Galiza com os organismos sociais que na Galiza defendem a galeguizaçom efetiva de todos os ámbitos de uso social, nomeadamente o ensino.
Tribunal Superior de Justiça da Galiza tomba "consulta às famílias"
Mais claro e direto foi o Tribunal Superior de Justiça da Galiza, que acaba de dar a razom à Mesa pola Normalización Lingüística no protesto pola supressom do galego do ensino a partir da fraudulenta "consulta às famílias" aplicada polo PP no início da anterior legislatura.
A sentença chega vários anos depois da aplicaçom do chamado "Decreto de Plurilingüismo", que serviu para reduzir o galego à mínima expressom no sistema de ensino da Comunidade Autónoma da Galiza. A anulaçom da chamada "consulta às famílias" serve para reafirmar a obrigatoriedade de que o galego tenha umha presença efetiva nas aulas galegas, o que de facto deixou de suceder graças à negativa do mesmo Tribunal a que, de maneira cautelar, fosse anulado o Decreto que o PP aplicou logo que chegou ao governo da Junta.
Resta agora comprovar se existe algumha retificaçom por parte do PP em matéria lingüística no ámbito educativo ou mesmo se a justiça impom essa retificaçom, caso nom se produza. Entretanto, a Mesa já avaliou "positivamente" a sentença do TSJG.