A CIG das Pontes manifestou o apoio aos/ás 27 traballadores/as de Daixong Spain ante a loita que están a levar para defender o seu dereito a percibir os salarios e a que se lles garantan os postos de traballo.
Dende que a empresa se instalou no Polígono de Penapurreira, explica o responsábel da Unión Local, Alberte Amado, estivo marcada pola súa política da precarización laboral, "sufrindo os traballadores/as continuos atraso nos pagamentos e xerándose débedas salariais, traballando en condicións que non cumpren a normativa de seguridade e padecendo despedimentos con anterioridade a este conflito".
Daixong Spain instalouse a finais do 2012 na localidade das Pontes e dedícase a elaboración de cable pretensado de aceiro. A firma chinesa cuxa matriz é a empresa china Tiajing Daixong Prestressed percibiu axudas diversas das Administracións (Plan Miner, Plan FerroL...) para a súa instalación na comarca.
Dende a CIG agárdase a implicación de todas as Administracións para que esta empresa non sexa outro proxecto errado, que se aproveita das axudas e remate pechando, ao igual que xa sucedeu con outras como foi o caso de CT-Rad, tamén instalada no Polígono de Penapurreira.