Neste contexto, os sindicatos "oficiais", CCOO e UGT, marcham juntos como sempre, fazendo da data um expediente administrativo ao serviço do sistema e da sua estabilidade.
De resto, as convocatórias som variadas e marcadas pola crise, as ameaças de agressons aos direitos laborais e a ainda insuficiente resposta unitária por parte do movimento obreiro e popular.
Sindicalismo nacionalista e de classe
No caso da CIG, a maior organizaçom de massas galega nom dependente de qualquer estrutura espanhola "superior", neste ano há oito convocatórias noutras tantas cidades e vilas da Galiza. O lema da convocatória deste ano é: "Emprego e salários dignos. Nom ao pacto social" e "O défice público que o pague o capital. Reforma fiscal já!".
Eis as mobilizaçons anunciadas:
Vigo, às 12:oo h. com saída do Cruzamento da Dobrada
Corunha, às 12:oo h. com saída da Praça de Vigo
Compostela, às 12:3o h. com saída da Praça Roxa
Ponte Vedra, às 12:3o h. com saída da Praça da Ferraria
Ferrol, às 12:oo h. com saída da Avda. de Esteiro
Lugo, às 12:3o h. com saída da Ronda da Muralha
Ourense, às 12:oo h. com saída do Pavilhom dos Remédios
Ribadeu, às 12:30 horas, com saída do Edifício Sindical
Além do apoio do institucional BNG, aliado à corrente maioritária na central nacionalista, as mobilizaçons contam com o apoio anunciado das forças políticas de esquerda nom reformista, como NÓS-Unidade Popular, o MpB ou a Corrente Vermelha.
CUT e CGT, juntas em Vigo
Mais um ano, a segunda central nacionalista galega, a CUT, marcha em Vigo junto à secçom galega da central anarquista espanhola CGT. A manifestaçom parte da praça de Fernando o Católico às 11 horas e a CUT convoca-a reclamando umha greve geral galega.
Esta mobilizaçom conta tradicionalmente com o apoio político da FPG.
CNT, anarco-sindicalismo também em Vigo
A mais veterana das centrais sindicais com presença na Galiza, a centenária CNT, convoca nesta ocasiom também em Vigo, polo fim das restriçons de direitos laborais. A marcha anarco-sindicalista parte às 12 do meio dia do cruzamento das ruas Gram Via e Lepanto com a rua Urzaiz, concluindo na Porta do Sol, onde terá lugar um comício.
A CNT de Ferrol anunciou que um autocarro viajará a Vigo levando trabalhadores e trabalhadoras à manifestaçom viguesa.
COG concentra-se na Corunha
A Central Obreira Galega, resultado de umha cisom da CUT, anunciou a convocatória de umha concentraçom às 11:15h. em frente da Delegaçom do Governo Espanhol na Galiza, na praça de Ourense nº 11, da Corunha.
Actividades complementares
Tal como vimos anunciando nas nossas páginas durante os últimos dias, Centros Sociais das cidades onde há convocadas manifestaçons operárias neste 1º de Maio organizam actividades complementares, nomeadamente festas e jantares. Podes informar-te lendo as notícias relacionadas mesmo abaixo destas linhas.
