Comezamos o percurso cunha concentración ante a sede do PsdG, continuamos a protesta na praza Roxa e dirixímonos despois á sede do PP, atopando moi boa acollida entre a xente que pasaba polas rúas. A intención era rematar este percurso ante o hotel Araguaney, onde se prevía a celebración dun acto electoral do PP con presenza do propio Feijóo, pero unha vez máis, os seus cans de garda impediron que lle ensuciaramos a foto. O forte dispositivo policial preparado para o acto bloqueou os accesos á rúa do hotel, aínda que non para os transeúntes, senón que só impediron a entrada ao grupo de CNT, demostrando unha vez máis de que cariz son a democracia e a liberdade de expresión das que presumen.

Só tras ter entrado comodamente e sen incidencias ao edificio o candidato da dereita "democrática", pupilo de fascistas como Romay Beccaría ou Fraga, e despois de non poucos intentos, conseguimos burlar uns controis policiais xa máis relaxados e accedemos á entrada do hotel, onde se manifestaba xa un grupo de persoas pertencentes á plataforma compostelá de afectados polas preferentes. Unímonos a este grupo en solidariedade co seu problema, protestando conxuntamente nun ambiente cordial e amosando unha vez máis que só co apoio mutuo e a acción directa se consegue plantar cara aos representantes do capital.

Non lexitimes o seu sistema. O 21O, non votes.