Mesmo antes de se iniciar o jogo, dava para ver que nos arredores do estádio herculino o ambiente era de reivindicaçom. A causa bem justa, respostar aos ataques que a torcida sofre longe da Corunha cada vez que querem ver o Desportivo mostrando a bandeira da Galiza.

Bandeiras galegas com a estrela da libertaçom nacional, com o escudo nacional galego desenhado polo patriota Castelao e muitas também com o ícone da vaca, animal que representa a naçom galega, fôrom inçadas das bancadas ao longo da partida e alegrárom ainda mais a fundamental vitória sobre o Espanhol. 

Com o jogo meado, umha grande bandeira nacional continuou o protesto da torcida corunhesa que denunciava a censura e perseguiçom à que seareiros desportivistas fôrom submetidos por portarem bandeiras galegas enquanto é permitida a exibiçom de bandeiras espanholas e fascistas.

A grande bandeira da República Galega parece que deu fôlegos aos jogadores branqui-azuis que logo metêrom o primeiro golo e endireitárom o caminho face a vitória final por 2-0.

Protesto convocado através das redes sociais

O sucesso desta açom convocada polas redes sociais ao longo da semana foi evidente. Ontem Riaçor ganhou algo mais do que um jogo: a permanêcia da Corunha em primeira divisom e a dignidade pola defesa da nossa identidade como povo.

Para além dos Blues, a claque mais conhecida do Desportivo, também a organizaçom juvenil Galiza Nova contribuiu com o êxito desta iniciativa repartindo bandeiras galegas na rua nos momentos prévios ao começo do jogo.