José Cadaveira, Bruno Lopes Teixeiro, Rebeca Bravo e Carlos Morais intervinhérom na conferência de imprensa convocada na capital da Galiza no meio-dia de hoje, para apresentar aos meios de comunicaçom a ediçom impressa do PTRP e fazer umha avaliaçom da atualidade política galega, caraterizada por umha forte multicrise e novas tendências de luita e agrupamento popular.
José Cadaveira lembrou a coerência com que NÓS-UP tem mantido o seu rumo político rupturista e revolucionário durante estes anos, destacando o papel do PTRP como plasmaçom do programa histórico da esquerda independentista galega para umha transiçom que conduza a Galiza para a independência nacional e o socialismo.
Rebeca Bravo sublinhou a especial dureza com que a crise está a golpear as mulheres galegas, em termos laborais e de direitos, com destaque para a prevista revisom reacionária da Lei do Aborto anunciada polo governo espanhol.
Carlos Morais incidiu no apoio de NÓS-UP à unidade de açom do conjunto de forças nacionais e de esquerda para defender a plena soberania nacional galega como parte de umha saída revolucionária à atual crise. A esquerda independentista tem disponibilidade, afirmou Carlos Morais, para avançar nesse caminho, com respeito pola pluralidade em torno de princípios irrenunciáveis em chave soberanista, de esquerda e antipatriarcal.
O companheiro Carlos Morais lembrou que NÓS-UP mantém a sua posiçom histórica, saudando as mudanças verificadas nos últimos tempos noutras organizaçons do ámbito da esquerda nacional, o que possibilita umha confluência em torno de um programa avançado e com base na mobilizaçom popular de massas nas ruas da Galiza.
NÓS-UP sublinhou a importáncia da iniciativa soberanista lançada nas últimas semanas por um grupo promotor de mais de 130 pessoas, que fará trabalho nom partidarista pola conscientizaçom social sobre a necessidade de romper com Espanha e construir o Estado galego.
Bruno Lopes Teixeiro expujo as principais linhas incluídas no Programa Tático hoje apresentado, explicando que fica aberto a novos contributos do movimento popular, como os que já fôrom incorporados nos últimos meses, até a configuraçom definitiva do programa de caráter revolucionário, independentista e feminista que a Galiza necessita.
Reiterando o apoio de NÓS-UP a todas as luitas que nos últimos tempos venhem estendendo-se em diferentes movimentos sociais e populares galegos. A esquerda independentista considera necessária a confluência dessas luitas para enfrentar a crise e as políticas reacionárias dos diferentes governos, provocando umha ruptura com o sistema capitalista espanhol e a construçom do Estado galego, de caráter socialista e nom patriarcal.
Os companheiros e companheira presentes no ato público de hoje lançárom umha proposta dirigida às diferentes forças da esquerda nacional: Umha convocatória unitária da esquerda soberanista para este Dia da Pátria.
Direçom Nacional de NÓS-Unidade Popular
Galiza, 16 de maio de 2013
