Este novo ato de perseguiçom contra a simbologia nacional galega por parte das forças repressivas espanholas aconteceu durante o jogo de futebol da primeira divisom espanhola entre o Valhadolid e o Desportivo da Corunha.

Outras adeptas e adeptos galegos relatárom a perseguiçom da polícia espanhola contra a presença da simbologia galega no estádio Zorrilla, do Real Valhadolid, um espaço público em que sim podiam ver-se, sem qualquer censura, bandeiras fascistas espanholas (monárquicas com o escudo franquista).

As redes sociais fervilhárom ontem sábado com os protestos de galegos e galegas a denunciar a discriminaçom constante a que somos submetidos aqueles e aquelas que exibimos os símbólos da nossa naçom em lugares onde se encontram as forças policiais espanholas.

Um dos afetados pola perseguiçom de ontem em Valhadolid foi retido durante quase meia hora só porque, segundo o informe policial "levava umha bandeira independentista galega". Grave delito, polos vistos, que levou a que o nosso compatriota, que se negou a retirá-la, fosse expulso do estádio do clube castelhano.

Factos semelhantes tenhem acontecido nos últimos meses nom só em território espanhol, mas também em estádios e pavilhons galegos, onde os fardados espanhóis provocam e retiram bandeiras e outros símbolos da nacionalidade galega.