AMI

Por quarto ano consecutivo Siareiras Salegas organiza em solitario o partido da Seleçom Galega de Futebol, já sendo frequente o pasotismo do PP polo nosso desporto. A jornada transcorrerá em Ponte Vedra o dia 29 de Dezembro, será um partido amigavel com a seleçom de Curdistám.

Mais um ano siareiras galegas encarrega-se da organizaçom do partido, queremos reconhecer o grande esforço que esto supóm todos os anos e também recordar a grande importancia que tem este dia, já que aparte de ser o único dia no ano que as galegas podemos ver em jogo a nossa seleçom, a causa do grande empenho que tem o governo de Feijoo em nom reconhecer a Galiza como naçom, é um dia para reivindicar a total oficialidade das nossas selecçons desportivas.

Mas como recorda siareiras isto da-lhes a liberdade de eligir umha companheira de jogo que partilhe a nossa causa. Este ano Curdistám, trata-se da naçom mais numerosa privada de estado do mundo(26 milhóns de pessoas), o Povo Curdo sofre a repressom de quatro estados diferentes, Iram, Iraq, Siria e Turquia.

Agardamos que a jornada tenha o êxito, já habitual, dos anos passados. E animamos a qualquera pessoa que se sinta galega e desfrute com o desporto a assistir o dia 29 de Dezembro a Ponte Vedra, no campo de futebol da Junqueira ao igual que a manifestaçom pola oficialidade da Nossa Seleçom que sairá as 19:00hh da Praça da Ferraria.

Duas naçons, um objectivo: Oficialidade!

Briga

Aí vem um novo jogo da seleçom mista, masculina e feminina, de futebol de campo da nossa seleçom nacional. Nom oficial, nem enfeitada com milhons de euros em salários desorbitados, campanhas publicitárias e idiotice de fácil consumo. Nom. O jogo que aí vem é o organizado por dúzias de ativistas através do coletivo Siareir@s Galeg@s, entidade de promoçom do desporto nacional dumha óptica nom sexista nem capitalista, focada a colocar as bases da oficialidade das seleçons desportivas de Galiza no ámbito internacional, como naçom com direito a decidir, e a competir.

Para @s jovens galeg@s que nos temos organizado fazendo da independência nacional umha peça chave do nosso ideário e prática quotidianas, o labor de Siareir@s Galeg@s no terreno desportivo é um exemplo que alargar a outros campos. Mas também é umha genuina expressom de que a vida desportiva deve ir para além do mero seguidismo das instituiçons privadas capitalistas feitas ao desenho dos grandes negócios mafiosos, e incentivar umha tomada de responsabilidade e açom direta sem aguardar pola permissom do poder, nem do seu apoio moral ou económico.

Siareir@s Galeg@s é mais umha manifestaçom dessa Galiza maioritariamente juvenil que nom sae refletida nos inquéritos, nem nos programas de rádio ou televisom da política convencional. Umha juventude consciente que continua dia a dia a sofrer no seu próprio país a miséria da dependência nacional, a desestruturaçom da nossa identidade coletiva através da dominaçom exercida por Espanha e a UE. E que sabe que, quer no futebol-campo como exemplo atual de desporto mais popular, quer na nossa prática diária como estudantes ou trabalhadores, desempregadas/os e explorad@s, ser galeg@s nom é um ritual folclórico nem um capricho burguês; é umha necessidade objetiva das massas populares da juventude dum território espoliado e ameaçado seriamente de sobrevivência polo capitalismo, por Espanha, a UE e o FMI, e que encontra na sua bandeira nacional o símbolo da soberania popular contra o império do mercado machista e inimigo das culturas e povos do mundo.

Polo valor dessa consciência, pola força dessa bandeira de resistência e desobediência ao poder estatal constituido, BRIGA apoia, anima @s Siareir@s deste País, e chama a juventude a participar da mobilizaçom com o galho do jogo deste natal em Ponte Vedra.

METAMOS UM GOLO A ESPANHA!
ADIANTE SIAREIR@S!

Isca

O vindeiro sábado 29 de dezembro terá lugar umha nova jornada de reivindicaçom pola oficialidade das nossas seleçons desportivas. A pesar do bloqueio da Junta do PP e da Federaçom Galega, o colectivo Siareir@s Galeg@s nom renunciou a que o desporto galego tivesse umha oportunidade de se visibilizar, e por meio da auto-organizaçom, fôrom quem de fazer possível que este ano, como desde hai seis, houvesse um encontro da seleçom galega de futebol nestas datas. Ademais, desta volta sumará-se a novidade dumha exibiçom de futebol gaélico, desporto que está a divulgar-se polo nosso país nos últimos tempos. A cidade escolhida é Ponte Vedra e o rival a seleçom do Curdistám, um povo que, coma o nosso, vê negado o seu dereito à autodeterminaçom. Assim, esta convocatória debe servir-nos para solidarizarmo-nos novamente com o povo curdo, oprimido com a cumplicidade hipócrita de organismos internacionáis como a ONU ou a Uniom Europeia.

Esta nova convocatória demostra que pese à ofensiva do Partido Popular contra os nossos sinais de identidade nom conseguírom calar a voz de quem reclamamos os direitos da Galiza a competir como país, a oficialidade das nosas seleçons desportivas e o nosso direito a ter representaçom e equipas próprias em competiçons oficiais.

Frente à imposiçom do desporto como um agente espanholizador e como um negócio de massas dirigido pelo capital, quem apoiamos esta iniciativa defendemos o desporto de base e a cultura propriamente galega. Frente a estas agressons, o 29 participaremos da oferta reivindicativa d@s siareir@as, que vai desde a bilharda e os jogos populares até um jantar popular ou a oportunidade de escoitarmos a música doutras naçoms negadas e também da nossa, reivindicando assim um lezer na nossa língua e alternativo a modelos impostos.

Desde Isca! louvamos o esforço d@s siareir@s e fazemos um chamado a participar desta jornada lúdico-reivindicativa e da manifestaçom nacional que percorrerá as ruas pontevedresas reivindicando o direito da Galiza a contar com seleçons próprias e oficiais, mais um passo na loita pola soberania nacional.

UMHA NAÇOM, UMHA SELECÇOM!