Nao nom gostou da carta protocolária que recebêrom do Conselheiro de Educaçom e Cultura para os parabenizar por ter ganho os  Prémios Martim Codax da Música Galega 2014 na categoria do melhor projeto Metal. A banda decidiu devolver-lha com umha carta aberta assinada polo mestre e cantante P. Carracedo (Jasper) na qual aproveitam para criticarem a sua gestom e dar-lhe um feixe de conselhos para o apoio e promoçom da cultura galega desde a Junta da Galiza. 

“Os músicos e músicas galegas levamos também padecendo a inutilidade do seu cargo desde a sua nomeaçom”, escreve Jasper na carta na qual acusa Jesús Vázquez de esbanjar milhons de euros em negócios, eventos e programaçons na Cidade da Cultura quando sofrem “o arrocho do orçamento para os festivais e como se recusam as ajudas, pondo travas contínuas aos eventos culturais de base”. 

Define o Conselheiro como a “antítese” do que Nao defende, quer dizer, umha “cultura livre, libertadora e popular e aproveitam para lhe dar alguns conselhos como a criaçom de umha infraestrutura musical que permita que nasçam novos talentos, a atualizaçom do Xabarim Clube ou que ativem a possibilidade de que as bandas soem na rádio pública. “Em definitiva, mude de mentalidade e comece a fazer país”, espetam ao Conselheiro a quem, em vez de parabenizar, pedem que, por exemplo, contribua para que esse retransmita ao vivo a gala dos Martim Codax. 

Também como professor

Na sua condiçom de mestre, o cantante da banda critica tamén o deterioro do ensino público con exemplos como a perda de professorado para o alunado com dificuldades, a imposiçom do decreto que merma o uso do galego ou a política de favorecer o ensino privado. “Os seus atos passarám fatura nas vindouras geraçons de fracassados escolares, excluídos sociais e analfabetos na língua própria”, afirma.