Na noite de Santos de 1994, bandas de todo o país reuniam-se na aldeia de Viana em Chantada convocados polos Rastreros numha noite inesquecível para quem participou do encontro. Nascia um movimento ao que se iam somar grupos de rock e outras iniciativas culturais que identificavam também umha maneira de ser, umha posiçom diante do mundo que respondia a um breve e contundente nome: Bravu.
O Bravu está de aniversário e vinte anos depois, os Diplomáticos de Monte Alto, chefiados por Jurjo Souto, estám a preparar a celebraçom e, entre outras cousas, van gravar um novo tema para o que convocam a quem quiger a participar na festa do Ano Bravu. Agradecem a quem quiger colaborar que se some à experiência de aparecer no vídeo-homenagem dos Diplomáticos que se gravará esta quarta 30 de abril em Vigo, às 19 horas na praça da Constituiçom e a quinta, 1 de maio na Corunha, às 19 horas, na praça de Sellier (zona rua do Orzám). A ideia é que a música poda ser apresentada no festival de Cans o próximo 24 de maio no marco de umha retrospectiva do movimento Bravu.
A explossom cultural com as raízes chantadas no rural será neste ano protagonista de diversas iniciativas culturais, com especial presença no festival Revenidas, ou no Castanhazo de Chantada, o encontro musical mais genuinamente bravu. Em breve será apresentada também a biografia sobre Os Diplomáticos de Monte Alto da que é autor o jornalista Rodri Suárez.