O livro está baseado no conhecimento direto do Movimento dos Trabalhadores Rurais Sem Terra do Brasil. O diário escrito por Xosé García no mês de agosto de 2003, durante a sua experiência no Estado da Bahia para observar a luita deste movimento agrarista, constitue a parte central da obra. Ademais, o volume oferece dous capítulos sobre o nascimento do MST em 1984 e a sua trajetória nos últimos trinta anos, umha entrevista recente ao líder João Pedro Stédile e mais un caderninho de trinta e duas fotografias em cor tiradas polo propio autor.
Baixo a lona preta representa a mais completa e singular monografia publicada na Galiza sobre o Movimento dos Sem Terra, ao reunir numha só publicaçom a informaçom histórica, a perspetiva jornalística e o testemunho pessoal sobre este moveminto social cuja releváncia e influência som reconhecidas de forma unánime em todo o mundo. Como afirma o próprio Xosé García no limiar, a leitura do livro permite conhecer "quem som estas gentes que lhes dim Sem Terra; qual é a sua teima; de onde vem essa genreira que lhes jostrega desde os altofalantes dos meios de comunicaçom, desde as pistolas da polícia e dos jagunços, desde os tribunais, desde as classes políticas mais rançosa do país; que é o que fijo que milhons de pessoas, após a queda do Muro de Berlim, voltassem acreditar num socialismo real edificado desde o alicerce das massas populares".
Xosé García Rodríguez é jornalista e escritor. Coordena o periódico Fouce, vozeiro do Sindicato Labrego Galego, e tem trabalhado ou colaborado en numerosos meios de comunicaçom como Tempos Novos, Praza Pública, A Nosa Terra, La Voz de Galicia, Diagonal ou Página Abierta. Como criador obtivo o I Premio de poesia Letras de Cal con Presencia da fenda (2001), livro que assinou como Xosé de Cea, e mais o I Premio Meiga Moira de Literatura Infantil e Juvenil con O lume dos soños (2004), publicado com o pseudónimo de Cibrán Ulloa.
Com esta obra, Estaleiro Editora dá continuidade à sua vontade de fornecer ferramentas para o pensamento crítico e a dinamizaçom cultural. Baixo a lona preta. Xornal de viaxe dun brigadista na Bahia do MST pode ser aquirido nos pontos habituais de distribuiçom da editora polo preço de 10 euros. Ao mesmo tempo, pode ser descarregado de balde na sua página web: www.estaleiroeditora.org.
