Jornalista, escritor e pintor, representará aos países da Lusofonia no festival que organiza a Sociedade Cultural e Desportiva (SCD) do Condado. Recitará os seus poemas na tarde-noite do sábado, 1 de setembro, junto com Daniel Salgado, Xiana Arias, Roi Vidal, Eduardo Estévez, Ramiro Vidal, Susana Sánchez Aríns, Gonzalo Hermo, Silvia Penas e Claudio Rodríguez Fer.

O festival começa na sexta-feira, 31 de agosto, com a inauguraçom da exposiçom de Humor Gráfico, na que se poderám ver mostras do trabalho de Xaquín Marín, Pepe Carreiro, Gonzalo ou Xosé Lois, entre outros. Também se vai projectar o filme Doli, doli, doli... Coas conserveiras, e, desde as dez e meia, a cantante Sés actuará na Noite das Minas. Para assistir é necessário reservar entrada no correio electrónico scdcondado@scdcondado.org.

No sábado as actividades começam de manhá com um passa-ruas, um aberto de bilharda, a abertura da feira de artesanato e associaçons, e umha mesa redonda com repressentantes da CIG, CUT, e da Assembleia de Parados/as do Porrinho, sobre o lema do festival: 'Capitalismo é um feito, revoluçom um direito'. Na tarde celebra-se a Festa Infantil, com obradoiros de jogos tradicionais, e projectam-se as curtas premiadas no Festival de Cans.

Pola noite, desde as nove, terá lugar o Festival Poético Musical, que apresentam Clara Gayo e Íria Pinheiro. Ademais dos e das poetas mencionadas, actuam os grupos O Sonoro Maxín, Cuchufellos, Sacha na Horta e Dios Que Te Krew.

Como cada ano, a SCD edita umha compilaçom de textos dos e das poetas participantes que se poderá adquirir nos dias do Festival. Ademais, disponibiliza todo tipo de serviços para o público, como campismo, duchas, etc., de balde.