O coletivo a prol da oficialidade das seleçons desportivas galegas, Siareir@s Galeg@s], acudirá o vindeiro dia 21 de maio ao Congresso dos Deputados, em Madrid, onde participará numa comparecência conjunta com o coletivo pro-oficialidade basco ESAIT e com a Plataforma proSeleccions Esportives Catalanes. Ali, representantes dos tres coletivos lerám um manifesto conjunto no que vindicarám o direito da Galiza, Euskal Herria e Catalunya a contar com seleçons desportivas próprias que puderem competir de forma oficial em competiçons internacionais.
A iniciativa, que parte de ESAIT, enquadra-se dentro dumha campanha que servirá para levar à capital espanhola a vindicaçom da oficialidade, com motivo da celebraçom da final da Copa do Rei, entre o Athletic Club e o F.C.Barcelona, que terá lugar o 25 de maio em Madrid. Siareir@s Galeg@s, ESAIT e a Plataforma proSeleccions Esportives Catalanes continuarám trabalhando em açons institucionais conjuntas, sendo a vontade levar umha proposta aos parlamentos das comunidades galega, basca e catalá, respetivamente, para o reconhecimento da oficialidade das federaçons desportivas próprias e a sua capacidade para competir de maneira internacional, amparando esse direito de forma legal. Aliás, deste modo, as jogadoras e jogadores federados poderiam escolher com que seleçom competir, eliminando as possíveis sançons atualmente vigentes por nom acudir à convocatória da seleçom espanhola.
No Estado espanhol existem seleçons desportivas coma as de Galiza, Euskal Herria e Catalunya "que nom tenhem direito a participar em competiçons internacionais de jeito oficial. A razom é que o governo espanhol impede a estas selecçons a presença internacional por meio de pressons diplomáticas e mesmo procedendo a mudanças nos estatutos dalgumhas federaçons internacionais para impedir a devandita participaçom".
A esta falta de reconhecimento, indican SS.GG, "já grave de por si, no caso galego há que engadir o ataque que supom a negaçom da seleçom galega oficial por parte da Xunta de Galicia, perpetrada polo presidente Alberto Núñez Feijóo nada mais chegar ao cargo. A escusa da "austeridade" nom val para justificar o que nom é senom umha parte mais da cruzada anti-galega do PPdeG mais espanholista".
