"A gravidade das irregularidades cometidas e a manifesta ilegalidade do procedemento polo que se aprobou o proxecto de derrubo do edificio da Casa da Xuventude, son unha mostra mais do absoluto desgoberno que sufre a cidade baixo o goberno do PP".
Desde Compostela Aberta reclaman a necesidade de acabar con actuacións coma esta, carentes de información pública, que impiden a participación e o control deses abusos por parte da cidadanía e o dispendio dos fondos públicos.
Unha vez coñecido o recurso presentado pola Plataforma cidadá "Defender o público-Salvemos a Casa da Xuventude" contra o derrube do edificio da Casa da Xuventude e a argumentación legal do mesmo, "queda en evidencia unha vez mais a falta de rigor e a trapalleira forma de gobernar que ten o Partido Popular en Compostela".
Desde Compostela Aberta súmanse á denuncia das graves irregularidades cometidas polo Concello e Santiago de Compostela na tramitación do expediente para o derrubo da Casa da Xuventude.
"Empezando polo incumprimento flagrante do Plan Especial que para este edificio propón medidas concretas de tratamento de fachada para a súa mellor integración ambiental no conxunto e nunca a demolición, e o incumprimento tamén da Lei de Patrimonio Cultural de Galicia porque a derruba pretendida só é posible coa substitución do edificio derrubado por outro de nova edificación que cumpra as determinacións do plan"- explican.
Ademais denuncian a utilización fraudulenta do artigo 44 da Lei do Solo que fala de cambio de usos dotacionais de terreos e que aquí se aplica sen ningún rubor a un edificio dotacional, e pola ausencia total de calquera trámite de información pública, que permita a participación e o control deses abusos por parte dos cidadáns.
E faino a pesar de existir informes técnicos internos desde o 2.012 que alertaban de que o propio Plan Especial prevé unha solución de accesibilidade ao Parque de Belvís, polo que a actuación pretendida leva consigo un maior custo para as arcas públicas e unha perda patrimonial derivada da derruba do edificio.
Compostela Aberta avoga por manter o edificio con usos socio culturais ao servizo da cidadanía e facer a conexión entre a Praza do Matadoiro e o parque de Belvís tal e como contemplaba o Plan Especial: "Nestes tempos de crise o Concello non pode propor a demolición dun edificio da súa propiedade de 1.500 m2, valorado en mais de un millón de euros, e simultaneamente dicir que elimina os usos socio culturais do palacete da finca do Espiño porque necesita espazo para dependencias propias do concello".
Esixen "un pouco e rigor e sentido común na administración do patrimonio público municipal, do que xa forma parte a Casa da Xuventude, e a eliminación de políticas de dispendio dos fondos públicos e de eliminación de edificios con uso socio cultural ao servizo dos cidadáns".
Igualmente esixen do Concello que obrigue a Xunta de Galicia a devolver o edificio en correctas condicións de uso e conservación, efectuando as obras de mantemento necesarias antes da súa cesión definitiva ao Concello de Santiago de Compostela.