Sem dúvida a Marcha deste ano está marcada pola aprovaçom da reforma da Lei de Costas por parte do Partido Popular nas Cortes espanholas. Confirma-se o que dizíamos há um ano e esta reforma deixa as maos livres ao governo espanhol para renovar a concessom a ENCE mais lá de 2018.

Mas nom é esta a única confirmaçom, também se confirmou nas últimas semanas que a sucursal autonómica do PP, com Feijó à cabeça e esquecendo o programa eleitoral e as múltiplas declaraçons realizadas contra a continuidade de ENCE em Louriçám, nom descarta apoiar esta. Realmente a ninguém surpreende isto, todas e todos sabemos que o PP e ENCE som unha e carne, nom por acaso ex-ministras como Isabel Tocino e outros antigos altos cargos fam parte da sua direçom. Como sempre, o PP defende e defenderá os interesses de grandes empresários e banqueiros, nom os da maioria social.

Isto aclara o panorama e situa cada quem no seu lugar numha luita à que ainda lhe restam muitas batalhas. Todo o mundo sabe que ENCE é umha hipoteca para o entorno da Ria de Ponte Vedra, umha lousa económica e ambiental para a comarca mas também para toda a Galiza, especialmente se falarmos dos nossos montes, condenados ao monocultivo do eucalipto e impedidos de um emprego diversificado e que gere muita mais riqueza e bem-estar.

Como dizemos, restam muitas batalhas nesta luita, e da nossa implicaçom depende que os planos desta prepotente empresa contaminante e dos seus lacaios políticos se vejam frustrados. A criaçom da Plataforma 2018 contra a prórroga (da que NÓS-Unidade Popular fai parte), que abrange organizaçons ecologistas como a própria APDR, comunidades de montes, associaçons de vizinhas/os, organizaçons políticas ou movimentos sociais, é umha boa notícia que reforça as posiçons contrárias à continuidade de ENCE em Louriçám depois desse ano. Avante!!!

ENCE e Elnosa fecho já!

Ponte Vedra, maio de 2013