A tea, situado xusto na ladeira do Monte Pindo máis inmediata ao Mirador do Ézaro, recibirá a comitiva da Volta Ciclista a España, cuxa 12ª etapa conclúe nesta panorámica privilexiada sobre o Monte Pindo e o Cadoiro.
Con esta iniciativa, que levábamos un tempo a argallar, os veciños e amantes do Monte Pindo agardamos elevar a reivindicación a favor do Parque Natural non só entre o público asistente, senón mesmo irrumpir simultaneamente en millóns de fogares a través dos seus televisores aproveitando a ampla cobertura mediática do evento, e sensibilizar a todos os amantes do deporte na natureza de que só con medidas reais, ponderadas e serias podemos rescatar espazos naturais tan interesantes coma é o Monte Pindo do abandono e dos múltiples perigos que o ameazan de xeito permanente: o último, hai poucos meses, foi un incendio preto de onde hoxe remata a proba ciclista, e que afortunadamente non chegou a extenderse ao conxunto do monte, pois nesas condicións actuais remataría arrasado sen freo posíbel.
A reivindicación tamén terá proxección en varios puntos máis da durísima rampa que dará remate á proba.