A construçom deste parque logístico em parte das paróquias de Tomeza e Bértola afetaria gravemente ao rio Gafos destruindo umha zona de alto valor ecológico. As construçons chegariam praticamente ao pé do leito atual além de precisar todo o conjunto obras de encauçamento ou canalizaçom para evitar a possibilidade de inundaçons, com a grave alteraçom de todo o entorno.
Fai-se importante assinalar que já existem alternativas como é o caso de Leborei em Cerponçons que haveria que estudar, e que no projeto atual a maior parte do parque logístico estaria situada dentro da zona de afeçom de 100 metros que marca a Lei de Águas, tal e como apontam informes realizados na preparaçom do Plano Geral de Ordenaçom Municipal do Concelho de Ponte Vedra.
Há que ter em conta que se fora efetivizada a realizaçom deste projeto a possibilidade de declaraçom de Espaço Natural de Interesse Local (ENIL) da zona sufriria um forte revês além de cercenar o crescente processo de recuperaçom do próprio rio Gafos.
De NÓS-Unidade Popular mostramos o nosso apoio e somamos a nossa voz à de aquelas que se oponhem frontalmente à consecuçom de mais umha nova agressom ambiental no nosso país, destacando à associaçom Vaipolorio que já apresentou alegaçons ao projeto e cujo trabalho pola recuperaçom do espaço natural do rio Gafos é amplamente conhecido.
Basta já de tantas agressons à nossa terra com a falsa e falaz escusa da criaçom de postos de trabalho ou mesmo do progresso. Casos flagrantes como o da piscifatoria de Tourinhám, a incineradora do Irijo ou, salvando as distáncias, o caso que nos ocupa com a construçom do parque logístico Ponte Vedra-Vila Boa que provocará a destruiçom do Gafos, tenhem que ser paralisadas. Para atingir tal objetivo o único caminho passa por umha forte e contundente resposta da vizinhança com a contestaçom nas ruas. Pois a esclerótica casta política governante que nada tem a ver com os interesses da classe trabalhadora só está para seguir as diretrizes que lhes dita o capital, e se este aposta pola sua construçom só a via directa terá a capacidade de por-lhe freio às suas ânsias de voraz rapina.
Polo tanto, de NÓS-Unidade Popular demandamos a imediata paralisaçom do projeto de parque logístico Ponte Vedra-Vila Boa e a retificaçom da Junta da Galiza perante mais um intento de destruir a riqueza natural da nossa patria.
Foto: Nós-UP
