Em Junho deste ano, começavam as emissons de Irmandade TV, com "O Debate", o espaço para a análise e a reflexom política, económica e social, apresentado por Aurélio Lopes. O novidoso formato veu a oferecer umha nova fiestra de informaçom e análise no panorama dos meios de comunicaçom no País.

A boa acolhida por parte do público nestes meses fijo possível novas propostas e formatos para a nossa audiência. A emissom em direto, desde Madrid, do julgamento aos independentistas galegos na Audiência Nacional espanhola; a emissom ao vivo do debate sobre o estado da autonomia ou o debate com a participaçom de Beiras, Vence, Morais e Cuinha tehem sido emissons muito agradecidas polo público. Na mesma linha, temos incorporado o 'Caleidoscópio', programa de entrevistas, apresentado por Pedro Afonso e a 'Fouce Sonora', um espaço para a música galega, que verá a luz nos próximos días.

Fruto da boa acolhida do público e a vontade de Irmandade TV de continuar a avançar em qualidade e conteúdos, chega o direto com 'O Debate'. Hoje, dia 29, às 21;30, em www.irmandade.tv os telespectadores poderám acompanhar ao vivo este 10º programa do Debate.

Francisco Rodrigues, militante nacionalista e líder histórico da UPG, será entrevistado por Aurélio Lopes. Xabier P. Igrexas, achegará o seu comentário e reflexom. A nossa mesa de debate, composta por Goretti Sanmartín e Martinho Noriega, entre outros, debaterám sobre a recuperaçom económica que anúncia o governo de Madrid, a repercussom da Greve Geral no ensino e sobre a reforma da Lei local promovida polo executivo central. Vítor Giadás, o controlador de redes, achegara-nos chios destacados da rede social Twitter, sobre os temas em Debate.