Apresentará um escrito no Registo do Concelho hoje, 20 de novembro, às 13:00 horas.

A Associaçom Cultural A Revira reclama da Cámara Municipal a retirada dos símbolos franquistas que ainda perduran na nossa cidade. O coletivo sinala que ainda perduram diversas placas da "Delegación Nacional de Sindicatos", umha delas de grandes dimensons na rua Santa Clara, ademais do escudo franquista, com o seu lema "Una Grande Libre" num relevo escultórico na rua Michelena. Afortunadamente a cidade conta com poucos símbolos franquistas, em comparaçom com o que acontece noutras urbes galegas, mas é tempo já de proceder à definitiva eliminaçom destes vergonhentos resíduos do totalitarismo.

A eliminaçom destes símbolos nom só representa um acto de higiene democrática que já chega muitos anos tarde, senom que é umha obriga legal que tenhem as administraçons públicas, segundo afirma o artigo 15 da Lei de Memoria Histórica aprovada no ano 2007. Neste sentido, A Revira apresentará manhá -37 anos após a morte do ditador fascista- um escrito no Registo do Concelho, às 13:00, no que se exporá de forma razoada esta reivindicaçom. Os meios poderám recolher declaraçons.

Ademais, A Revira organizará o vindouro 6 de dezembro um roteiro urbám sobre a repressom franquista na cidade, dentro das actividades do seu IX aniversário, com a intençom de aprofundar no conhecimento histórico deste negro periodo. Assi também se pretende contribuir à reivindicaçom das liberdades e à necessária concienciaçom contra a ameaça fascista, que sempre retorna em tempos de crise profunda como os que vivemos.