Consideramos que agressons como a do passado sábado 17 na cidade da Corunha devem despertar a contestaçom solidária própria da classe trabalhadora. Conseqüentemente, chamamos a apoiar e dar difusom à mobilizaçom que terá lugar hoje, quinta-feira 29 de dezembro, às 20 horas, convocada pola Associaçom Sem Papéis e o Foro Galego de Imigraçom.

Infelizmente, vem sendo norma a atuaçom desproporcionada das instituiçons repressivas com os e com as migrantes, nesta época do ano e nas zonas comerciais das principais vilas galegas. O novo episódio desta injustificável agressom, que o é também aos direitos do conjunto das e dos trabalhadores, aconteceu no passado sábado 17 de dezembro quando axentes policiais à paisana procedérom a deter um dos vendedores ambulantes, segundo testemunhas, valendo-se da força e com umha atitude intimidatória.

À margem da manifesta ilegalidade do procedimento, na CUT entendemos que a análise simplista que focaliza a questom nos supostos danos ao pequeno comércio, nom é mais que um jeito de divisom da classe trabalhadora. Os "camelós" (vendedores ambulantes) ou "sem papéis" estám a sofrer a crise sistémica como o resto dos operários e operárias, incluídos os pequenos comerciantes. Atacar a sua forma de subsistência económica reflete umha violência inerente às nossas instituiçons que devemos responder com unidade e inteligência.

Como central sindical que procura desenvolver um programa próprio e independente no campo da imigraçom, fora da cultura excludente das grandes siglas, damos o nosso apoio à mobilizaçom desta quinta-feira e parabenizamos a Associaçom Sem Papéis, à espera de que a sua luita, que sentimos nossa, continue a crescer no futuro.

Foto: Colantes Combativos