A máxima instância jurídica a nível estatal pronunciou-se esta quinta feira respeito ao recurso de casaçom apresentado polos advogados dos quatro independentistas que fôram julgados na Audiência Nacional em Junho do ano passado. Em setembro desse mesmo ano Eduardo Vigo e Roberto Rodrigues fôrom condenados polo Tribunal de Exceçom a 18 anos de cadeia cada um e Maria Osório e Antom Santos a outros 10.
O TS rebaixa as penas ditadas pola AN ao considerar que as condenas aplicadas fôrom "desproporcionadas"e a sua sentência carecia de motivaçom. Ademais, o TS considerou o facto de que os quatro independentistas careceram de antecedentes penais. Desde jeito Eduardo Vigo e Roberto Rodrigues cumprirám 13 anos e 9 meses e Maria Osório e Antom Santos 7 anos e 9 meses.
Por outra parte, o máximo órgano judicial ditaminou que a efeitos jurídicos Resistência Galega é umha "organizaçom terrorista" ainda que na sua fase mais incipiente e que tem como objetivo "subverter a orde constitucional espanhola". Com esta afirmaçom o TS desestimou a argumentaçom da defesa que sinalara no seu recurso que tal organizaçom nom existe devido a que "nom há financiaçom nem jerarquia" polo que "caberiam outras respostas penais mas nom a expansom do conceito de terrorismo".
A defesa está a aguardar que nas vindeiras horas lhe seja remitida a sentência ao completo para poder fazer qualquer tipo de valorizaçons.