Foto: Um momento da intervençom de Inácio Hernando, antigo camarada de Reboiras, junto a Joám Lopes e Eliseo Fernández, ontem no Ateneu Ferrolano (Diário Liberdade).

Às 20 horas, o local do Ateneu Ferrolano acolheu o primeiro dos atos previstos, organizado pola Comissom Moncho Reboiras de Ferrol.

Apresentados por Joám Lopes, tomárom a palavra o historiador Eliseo Fernández e o histórico militante independentista Inácio Hernando, que foi camarada de Moncho Reboiras na Frente Armada da UPG.

O primeiro deles fijo umha contextualizaçom das luitas sociais e políticas nos últimos anos do franquismo, assim como da evoluçom do nacionalismo galego, que viveu umha importante expansom graças ao trabalho de militantes como Moncho Reboiras, em ámbitos como o sindical, o cultural e o político.

Inácio Hernando lembrou a figura do seu camarada, com o qual partilhou ativismo clandestino durante anos, numha intervençom de grande interesse centrada no dia a dia da militáncia independentista e comunista em pleno franquismo.

A Comissom Moncho Reboiras, formada por setores diversos da esquerda nacional e independentista em Ferrol, vai continuar hoje com a programaçom prevista, incluindo a elaboraçom de um mural coletivo e umha concentraçom de homenagem às 20:30 na rua da Terra, onde Reboiras morreu assassinado pola polícia franquista. Haverá poesia e Lara Soto falará em nome da Comissom Moncho Reboiras.

Atos da UPG, MGS, CIG, Agora Galiza e FPG

Hoje decorrem também os atos de homenagem organizados por diversos partidos e pola CIG.

A UPG convocou umha concentraçom na praça do concelho de Ferrol às 19 horas, seguida de umha oferta floral na rua da Terra e de um ato político no Cantom. Ali tomarám a palavra Adrián R. Bravo, secretário-geral da UMG, Eva Espinheira, concelheira do BNG em Ferrol, e Néstor Rego, secretário-geral da UPG e membro da Executiva Nacional do BNG.

Às 12 horas, a CIG fará um tributo floral a Moncho Reboiras no cemitério de Imo, no concelho de Dodro.

O Movimento Galego ao Socialismo fará a sua habitual homenagem nesse mesmo lugar, onde repousam os restos do jovem militante galego. Haverá um roteiro cultural, poesia e um ato político com intervençom de Xoán Bautista Mariño, vereador do Bng Dodro, Rafael Mouzo, ex-presidente da Cámara de Corcubiom e Noa Presas, da Mesa Nacional do MGS e de Isca!

Agora Galiza convoca umha concentraçom também hoje em Vigo, às 20:30 horas no bairro de Teis.

A FPG fará a sua homenagem no próximo dia 15, também no bairro de Teis, em Vigo, às 12:30 horas.