A conta da organizaçom independentista no Twitter esclareceu que "A 27 de maio, NÓS-UP comunicou a TODAS as organizaçons nacionais soberanistas umha proposta aberta para um Dia da Pátria unitário".
A proposta da esquerda independentista obtivo o "silêncio" como resposta da maioria das organizaçons interpeladas, segundo um dos tuits publicados na conta de NÓS-UP. No caso do BNG, houvo umha reuniom na qual o Bloque transmitiu a sua negativa à convocatória unitária, impossibilitando o acordo. Assim foi transmitido posteriormente por NÓS-UP a Causa Galiza, segundo pudo saber o Diário Liberdade.
A juventude como exemplo
NÓS-UP situa como exemplo a unidade conseguida pola totalidade de organizaçons juvenis da esquerda soberanista, acrescentando que, perante a ausência de umha convocatória unitária "semelhante à das organizaçons juvenis", a esquerda independentista "estará nas ruas este 25J".
Até agora existia conhecimento público de que Causa Galiza tinha proposto um 25 de julho unitário convocado pola GPS, umha proposta da qual já informamos no Diário Liberdade no seu dia, e que tampouco deu certo.
Agora NÓS-UP quijo dar a conhecer, na sua conta no Facebook, a carta remetida no mês de maio às diferentes organizaçons da esquerda soberanista galega para umha convocatória comum, o que finalmente tampouco foi possível.
Reproduzimos a continuaçom o conteúdo da proposta de NÓS-Unidade Popular, dada a conhecer há umhas horas:
"Companheiros e companheiras,
O motivo de nos dirigirmos à vossa organizaçom, como umha das representativas da esquerda nacional e soberanista galega, é transmitir-vos umha proposta madurecida pola nossa organizaçom durante os últimos meses, e aprovada nas últimas semanas, que aponta na linha de assegurar, aprofundar e alargar a incipiente e parcial unidade de açom que algumhas entidades da esquerda soberanista e independentista galega vimos mantendo.
De NÓS-Unidade Popular, consideramos importante reagirmos de maneira coletiva, como galegos e galegas conscientes, frente à ofensiva que o espanholismo está a protagonizar contra o nosso povo e contra o projeto de construçom nacional que a Galiza tam necessita de maneira premente.
A situaçom é, como sabedes, especialmente grave e, nessa medida, exige respostas novas, abrangentes e motivadoras para reativar a luita nacional de classe e feminista na Galiza, garantindo assim o futuro e a viabilidade da nossa construçom nacional.
É com esse objetivo que NÓS-Unidade Popular propom que a vossa organizaçom estude a possibilidade de, entre todas as que pertencemos ao ámbito da esquerda nacional, convocarmos de maneira unitária umha manifestaçom neste 25 de julho, Dia da Pátria, na capital da nossa Naçom, Galiza.
Se houver acordo quanto à necessidade e às potencialidades simbólicas e práticas que para a reativaçom de importantes setores da esquerda social galega hoje desativados teria essa iniciativa, pola nossa parte, de NÓS-Unidade Popular estaremos em disposiçom de favorecer, na parte que nos toca e com a máxima disponibilidade, que a confluência patriótica e de esquerda seja possível neste 25 de julho.
É com esse objetivo que convocamos a vossa organizaçom para um encontro multilateral em que as diferentes organizaçons interessadas em lançar a iniciativa nos reunamos para, juntas, decidirmos e darmos forma a um Dia da Pátria unitário. Umha iniciativa, nom o esqueçamos, que seria inédita nas últimas décadas e poderia servir para criar as condiçons de relançamento de um forte movimento pola plena soberania nacional galega sob parámetros inequivocamente de esquerda e feministas.
À espera de que compartades connosco a avaliaçom sobre a gravidade do momento histórico e a oportunidade de umha resposta nacional conjunta como essa, ficamos à espera da vossa resposta e aproveitamos para vos enviar as nossas melhores saudaçons patrióticas, socialistas e feministas.
Direçom Nacional de NÓS-Unidade Popular Galiza, 27 de maio de 2014."