Numerosas atividades decorrerám neste fim de semana nos vários centros socias que há na Galiza, como por exemplo primeira Estalotada de 2015 do Pichel compostelano. Mas o tecido associativo nom descansa e já há atividades programadas para a semana próxima.
Hoje fôrom anunciados novos eventos em Lugo e Ferrol.
Lugo
Em Lugo o entruido já chega aos centros sociais, e o Mádia Leva! programa eventos relacionados com essa festa: Na quinta-feira 5 de fevereiro às 20h30 organizam umha palestra sobre o entruido tradicional na Galiza na que falará Xosé Manuel Seixas. Umha oportunidade para achegarmo-nos aos entruidos mais populares do País, as suas máscaras principais, etc. ... Também servirá para conhecer o entruido de Santiago de Arriba, em Chantada, local que a gente do Mádia Leva! visitará na terça-feira de entruido, 17 de fevereiro, para conhecer o seu tradicional Entruido Ribeirao. Cumpre inscrever-se para organizar a viagem.
O mesmo centro social luguês terá teatro no sábado 7 de fevereiro, com a representaçom da obra Einstein polo Grupo Teatral a Espelunca, composto por antigo alunado de português na Escola Oficial de Idiomas de Ferrol. Será às 20h00.
Ferrol
Precisamente em Ferrol, e no mesmo dia em que os e as luguesas desfrutaram dessa obra teatral, a Fundaçom Artábria propom visitar o Museu Galego de História Natural, sediado na Porta de Canido em Ferrol, da mao do biólogo e membro da SGHN Joám Luis Ferreiro, mais conhecido como Césio. O museu é fruto de muitos anos de trabalho da Sociedade Galega de História Natural contando com umha das mais importantes coleçons de restos ósseos de mamíferos marinhos. Para mais informaçom sobre o museu ou sobre a entidade que o gestiona pode-se consultar o seu web:http://www.sghn.org/. A visita partirá da mesma entrada do museu polas 17.30 e após a visita haverá petiscos no centro social ferrolano.