Foto do Diário Liberdade - Bloqueio, nesta quinta-feira, da Dia.
A transnacional distribuidora Dia decidiu nesta quinta-feira deslocar para o seu quadro de pessoal o custo da crise do setor láteo por ela provocada, junto de outras distribuidoras e indústrias.
Com a suspensom unilateral dos contratos por parte da empresa, as 120 pessoas que trabalham no centro distribuidor da Dia em Compostela ficam suspendidas de salário. A situaçom permanecerá, segundo a empresa, até que os e as gandeiras levantem o bloqueio que desde terça-feira mantenhem, impedindo a entrada ou saída de mercadorias.
O bloqueio responde à negativa da Dia de assinar um contrato que garanta preços em origem suficientes para satisfazer os custos de produçom. Nom é a única companhia que mantém essa posiçom: Alcampo ou Carrefour som mais duas com a mesma atitude e que também fôrom bloqueadas nestes dias. Com essa negativa, as ditas empresas tencionam manter o privilégio que fai com que hoje o preço médio polo que se compra o leite na Galiza à produçom seja de 27.9 cts./litro, enquanto o custo médio de produçom é de 34 cts./litro, de forma que o produtor ou produtora perde 6 cts./litro que vam para os lucros de companhias como a Dia.
A prepotência e o cinismo da transnacional Dia
O cinismo demonstrado pola Dia logo da medida ontem adotada nom conhece limites, ao denunciar a empresa "el daño que estos ganaderos están ocasionando no solo a DIA, si no al propio tejido empresarial local (proveedores, franquiciados, etcétera)", esquecendo as milhonárias perdas do conjunto do setor leiteiro por causa das políticas insustentáveis da companhia.
Antes da selvagem medida contra as suas e os seus próprios trabalhadores, a direçom de Dia denunciou durante dias alegadas perdas e diretamente ameaçou as e os compostelanos com um desabastecimento dos centros. Também falou em que os e as camionistas que trabalham para a transnacional "som autónomos" e "nom estám a poder cobrar", demonstrando outra forma como a empresa desloca para pessoas individuas a sua responsabilidade corporativa no escándalo do leite.
As constantes provocaçons da transnacional acabárom por dar na madrugada de quarta para quinta em umha sabotagem: os e as gandeiras expropriárom um camiom que se dirigia ao centro logístico da companhia e destruirom a carga, composta por leite de marca branca destinada à sua revenda por baixo do preço de custo. Isso todo apesar da açom de agentes espanhóis de distúrbios que agirom em defesa da Dia.
O locaute consentido na Galiza pola legislaçom espanhola, proibido noutros países
A suspensom unilateral dos contratos é umha figura permitida pola legislaçom espanhola, quem prevé o chamado locaute quando umha empresa estar baixo umha série de circunstáncias que empecem o normal desenvolvimento da sua atividade. Para a Organizaçom Internacional do Trabalho, o loucaute é, em verdade, "o fechamento total ou parcial de um o mais centros de trabalho ou a obstaculizaçom da atividade normal dos empregados" polo empregador "com a intençom de forçar ou resistir demandas ou expresar queixas".
Enquanto o Reino de Espanha autoriza essa prática selvagem, outros países como Portugal proíbem-na na sua consitutiçom.