Convocadas por quase 20 organizaçon sindicais, entre elas as três maioritárias -UGT, CIG e CCOO, milhares de trabalhadoras e trabalhadores públicos, apoiados por outros setores do povo trabalhador, saírom às ruas de Vigo, Corunha, Ferrol, Compostela, Lugo, Ponte Vedra e Ourense, nesta segunda-feira dia 30 de julho.

As federaçons da área pública dos diferentes sindicatos convocárom a mobilizaçom, que contou com a polémica presença de organizaçons de polícias e guardas civis, artífices da repressom contra o povo às ordens dos governos burgueses. Em alguns casos, a presença dessas entidades (a policial SUP, por exemplo) provocou assobios e gritos contra a presença de representantes das forças de choque do governo.

A perda do poder aquisitivo e dos salários, o aumento de horas e a reduçom de meios para o desenvolvimento de tarefas sensíveis como as ligadas à saúde, ao ensino e à administraçom pública, fôrom algumhas das denúncias realizadas polos trabalhadores e trabalhadoras que hoje saírom às ruas da Galiza.

Se bem o governo do PP calculou que a chegada do verao evitaria umha resposta significativa do pessoal afetado polas suas agressons, este ano está a ser inédito na alta participaçom nas convocatórias sindicais, enquanto o governo vê deteriorar-se o seu grau de aceitaçom por parte da populaçom sem que surja umha alternativa de esquerda capaz de aglutinar o descontentamento existente.

O rejeitamento às medidas do PP generaliza-se e encena-se em manifestaçons como a de Ferrol, onde foi queimado um caixom com o "cadáver político" do presidente espanhol, Mariano Rajoi, no interior, entre aplausos de milhares de pessoas.

Representantes sindicais anunciárom novas manifestaçons nos próximos dias, apesar do início do mês de agosto, no qual se desfrutam as férias de maneira maioritária.

Fotos anteriores: Manifestaçom de Ferrol (Diário Liberdade).

Fotos seguintes: Manifestaçom da Corunha (Diário Liberdade).