O Comité de Empresa realizará umha assembleia de trabalhadores e trabalhadoras na próxima semana para decidir o calendário de mobilizaçons perante a "absurda negativa" da direçom da empresa, dado que no presente ano a produçom ultrapassa com folga a do ano passado.
Conforme exprimem num comunicado, o aumento da produçom foi tal que Ence-Návia bateu recordes, e a companhia iniciou novos projetos de biomassa num mercado à alça, apesar do qual "cortam em quadro de pessoal e nóminas".
Entretanto, Ence, que também possui umha poluinte fábrica em Ponte Vedra –alvo frequente de protestos-, terá conseguido esses recordes graças a baixar a qualidade do produto, segundo acusa o Comité de Empresa no seu comunicado.
2 de maio: recorde histórico de produçom
A 2 de maio a direçom da Ence gabava-se por ter atingido o recorde histórico da planta de produçom de pasta de papel num dia só, com 1.674 toneladas. Assim, entre janeiro e abril de 2012 a fábrica naviega produziu quase 7% mais que no mesmo período do ano anterior.
"Continuamos a ser competitivos num mercado global", dizia na altura J. A. Camblor, diretor de operaçons da companhia em Návia. Com certeza, a precarizaçom e roubo dos salários do quadro de pessoal tem algumha cousa a ver.
... e já avançando notícias
Já avançando até julho podemos falar dos incêndios que, com certeza, vam castigar o nosso país daqui a poucas semanas, e que já antes de se produzirem tenhem claros culpáveis. Ence, com duas plantas na Galiza (Ponte Vedra e Návia), e que utiliza massivamente eucaliptos como matéria prima deve ser assinalada como um deles, ao favorecer a plantaçom desta espécie pirófita e invasiva.
Foto: Nuria M. Reyero - Fábrica da Ence em Návia.