Na manhá deste sábado o Parlamento Autónomo da Galiza era cercado por cerca de um milhar de pessoas, convocadas sob a legenda 'Pam, trabalho e teito', mas com umha multidom de variadas reivindicaçons: o direito à moradia, luitas trabalhistas, o direito ao aborto ou a contestaçom ao novo rei espanhol Filipe de Bourbon fôrom só alguns dos temas que tivêrom espaço esta manhá na capital galega. Com umha forte presença de coletivos polo direito à moradia e contra os despejos hipotecários, os e as manifestantes chegárom de diferentes pontos do país, embora houvo umha maior presença de comarcas como Corunha, Trasancos ou, claro, a própria comarca compostelana.
O edifício foi cercado com algum esforço polas e polos manifestantes, após terem percorrido os centenares de metros que o separám da estaçom de comboios compostelana e no meio de umha presença moderada de polícias espanhóis, que fôrom alvo dos gritos reivindicativos em vários momentos. Destacou a presença de numerosos profissionais do corpo de bombeiros que, com roupa de trabalho, participárom como serviço de segurança na manifestaçom, embora muitas outras entidades políticas (Anova, IU ou BNG, entre outras), sociais (plataformas contra os despejos, coletivos feministas, etc. ...), sindicais (CUT, SLG, CGT, STEG...) ou juvenis (Xeira) apoiárom o protesto.
Simbologia espanhola reforçada
Um dos factos mais patentes foi a forte presença de simbologia espanhola, nomeadamente de um grande número de bandeiras republicanas daquele país, embora também se registasse algumha presença de bandeiras republicanas da Galiza. Nesse sentido, cabe ter em conta que a manifestaçom dava continuidade às chamadas 'Marchas da Dignidade' que a 22 de março se citárom em Madrid com colunas chegadas de diferentes 'comunidades autónomas' (inclusive da Galiza), de forma que os protestos acontecem este sábado em todos os parlamentos autónomos do Estado espanhol.
Galeria fotográfica
A seguir umha galeria fotográfica realizada polo Diário Liberdade sobre o protesto da manhá de sábado em Compostela :
Created with Admarket's flickrSLiDR.