A palestra de Mitra, que contou com traduçom simultánea do inglês, serviu para dar a conhecer umha perspectiva diferente da que os meios difundem sobre o seu país. As críticas fôrom dirigidas em partes iguais às forças invasoras comandadas polos Estados Unidos, que sustentam pola força um governo corrupto como nunca se viu no Afeganistám, e ao fundamentalismo islamista, que mantém as mulheres numha situaçom de extrema opressom em todo o país.

A ativista afegá explicou o trabalho social de tipo assistencial que o movimento que representa realiza em ámbitos como o educativo, o sanitário e de apoio a crianças orfas, sempre à margem do governo, que nega qualquer colaboraçom às entidades populares alheias ao esquema de poder imposto.

Mitra falou da imensa corrupçom que envolve os membros do governo fantoche imposto polo imperialismo, cujos membros estám envolvidos no narcotráfico e amassam imensas fortunas sobre a pobreza da maioria do povo. Também explicou os interesses energéticos e geoestratégicos que explicam a história recente de guerras e ditaduras no seu país.

A pior parte na terrível situaçom do Afeganistám é padecida polas mulheres, que sofrem a guerra imposta polo imperialismo e a opressom da teocracia e dos movimentos islamistas, tanto o talibám como o ligado ao poder institucinal atual.

A representante da RAWA apelo para a solidariedade internacional com o movimento democrático que luita no interior do Afeganistám, enfrentando tanto as instituiçons corruptas pró-ianques como o fundamentalismo religioso.

Palestra em Vigo

O Espazo Aberto Antimilitar organiza neste sábado dia 11 de Dezembro, às 19h30, no CSA Cova dos Ratos (Romil, 3), umha palestra com Mitra, sob o título "Afeganistám, a sua realidade, vivida e contada polas mulheres".