Será no local da Semente em Vigo, e é precisa inscriçom prévia escrevendo para o centro viguês. O programa inclui acrobacias, malabares e palhassas e palhassos e vem a aumentar os conteúdos oferecidos pola Escola Semente da maior cidade da Galiza.

A Semente Vigo é umha iniciativa impulsionada pola associaçom Pró-Escola de Ensino Galego Semente e foi o segundo local dessa rede constituido no país, após o muito bem sucedido centro de Compostela.

Mais atividades em maio

O obradoiro de circo nom é a única atividade oferecida às crianças de Vigo.

Assim, um outro obradoiro, este de música para crianças, decorreu no passado dia 9 da mao de Sonsoles Martínez e Xandre Outeiro.

Ao longo de todo o mês, a Ludotega será um espaço lúdico em galego aberto às crianças e o espaço de encontro Sementinhas receberá as o os mais miúdos entre os miúdos.

Já para o final de mês haverá um curso de perfil mais adulto, com a norma AGAL do galego como temática principal.

O projeto das Escolas de Ensino Galego Semente

As Escolas de Ensino Galego som um espaço de uma pedagogia transformadora ao serviço dos interesses populares.

Som umha iniciativa social sem ânimo de lucro, impulsionada inicialmente pola Gentalha do Pichel, que fundou o primeiro centro dessas caraterísticas na capital do país, que pretende conformar, junto com outros projetos semelhantes, as bases necessárias para a criaçom da Escola Nacional Galega.

Tomam o nome das Escolas de Ensino Galego criadas a começo do século XX polas Irmandades da Fala, e impulsionadas por Leandro Carré e Ángelo Casal.

Nas Escolas de Ensino Galego, todas as atividades serám desenvolvidas na língua do nosso povo, favorecendo a aquisiçom, conservaçom, cuidado e consolidaçom da mesma. Nas Semente entedem o idioma galego como parte indissolúvel da nossa cultura, da nossa história e do nosso futuro, e defendem o seu carácter internacional. Criando um espaço de interculturalidade formentar-se-á a importância do respeito às outras culturas que vivem no nosso país.

O infantil é um período de muita importância para a vida futura da criança e é nesta etapa que se devem realizar as acçons de desenvolvimento psicomotor, o desenvolvimento inteletual, físico moral, estético e afetivo da criança, garantindo-lhe o desenvolvimento da sua personalidade, das suas competências cognitivas e da capacidade de se relacionar com as outras.

Na Semente as crianças tenhem o direito de brincarem como forma particular de expressom, pensamento, interaçom e comunicaçom infantil, bem como o aceso aos bens socioculturais disponíveis, ampliando o desenvolvimento das capacidades relativas à expressom, à comunicaçom, à interaçom social, ao pensamento livre e criativo.

A Semente está organizada por recantos: lógica-matemática, experiência, plástica, agochar-se, simbólico, musica, leitura, movimento e natureza.