Foto de Vicente Nadal (CC by-nc-sa/2.0)

A chamada Assembleia Cidadá Municipal da sucursal compostelana de Podemos aposta na confluência com a iniciativa municipalista Compostela Aberta para as eleiçons municipais que decorrerám na primavera deste ano.

Após um processo de votaçons online em que participárom os participantes no circulo de Podemos na capital da Galiza, "91,82% dos participantes na consulta optárom por umha candidatura de unidade popular" e dentre as candidaturas identificadas como tais pola formaçom madrilena, 57,71% escolhêrom Compostela Aberta.

Precisamente, foi Compostela Aberta quem, no ámbito das reunions com várias entidades políticas do ámbito compostelano, se juntara com os e as representantes da formaçom sob mandado de Pablo Iglesias no início do ano.

Agora, o fenómeno mediático entra também na candidatura municipal compostelana sem, no entanto, esclarecer nem um dos pontos do seu programa para a cidade, para além de um nevoento "fazer realidade a vontade da cidadania". E nom esclarecem apesar da que, afirmam, é a sua intençom "que seja a cidadania em umha maneira totalmente democrática, horizontal e transparente, quem tome as decisons de especial releváncia".

A formaçom teledirigida por Pablo Iglesias poderá vir a ganhar, assim, peso na capital da Galiza apesar da desconhecida trajetória de Podemos e os seus membros no ativismo social da cidade.