O Partido Independentista Porto-riquenho (PIP) informou na segunda-feira acerca do início dumha ofensiva internacional para que o Governo dos Estados Unidos comece um processo de descolonizaçom sobre território nacional.

Segundo o secretário-geral do PIP, Juan Dalmau, a decisom foi tomada após a participaçom de Rubén Berríos na III Cimeira da Comunidade de Estados Latino-americanos e Caribenhos (CELAC), celebrada recentemente em Costa Rica.

"Esta é umha nova ofensiva internacional para pressionar os Estados Unidos para que respondam à reclamaçom de descolonizaçom do povo porto-riquenho" assinalou Dalmau durante umha conferência de imprensa.

"O acontecido recentemente na CELAC marca o início do fim do colonialismo em Porto Rico, (...) nom tenho a menor dúvida (...) de que mais cedo que tarde Estados Unidos ver-se-á forçado a assumir a sua responsabilidade descolonizadora (...) pola vontade do povo e (...) pola pressom que os diversos governos latino-americanos porám (...) sobre o governo norte-americano" precisou o secretário do partido.

Por sua parte, o presidente do PIP, Fernando Martín, destacou a designaçom de Rubén Berríos como assessor especial do Governo da Nicarágua em matéria internacional, facto que qualificou como importante para a independência do país.

"Constitui também um apoio definitivo a Rubén Berríos e ao independentismo porto-riquenho, no esforço por mobilizar a opiniom pública latino-americana e caribenha a favor da descolonizaçom de Porto Rico" assinalou Martín.

Em contexto

Porto Rico figura como "Estado Livre Associado" dos Estados Unidos desde 1952, após ter sido cedido a este último por Espanha, que tivera controlo sobre a ilha desde a colonizaçom da América.

Ainda que na teoria Porto Rico mantenha um status de autogoverno, os porto-riquenhos som cidadaos estado-unidenses e o poder de exercer a sua soberania recai sobre o Congresso dos Estados Unidos.