Estas declaracións, que colleron por sorpresa a todos os representantes políticos da capital, foron matizadas unhas horas despois pola propia Xunta de Galicia, que negaba a existencia de tal concesión por máis que admitía que o proxecto de central de biomasa presentado por ENCE para Lourizán tiña sido admitido a trámite, polo que, evidentemente, non se pode descartar que esa concesión chegue a ser realidade nalgún momento.
Diante desta situación, desde a Asociación Pola Defensa da Ría (APDR) queremos facer as seguintes consideracións:
1º.- A instalación dunha planta de biomasa nos terreos que hoxe ocupa o complexo industrial ENCE-ELNOSA suporía unha nova burla á cidadanía da bisbarra, que unha e outra vez ve pisoteado o seu desexo de recuperar a Ría e a calidade de vida arrebatada por ENCE hai case que 50 anos.
2º.- Doutra banda, a instalación dunha central de biomasa en Lourizán podería supor a consolidación do complexo ENCE-ELNOSA no seu actual emprazamento máis alá do 2018; de feito, así o entende o comité de empresa de CELULOSAS que mostraba a súa ledicia coa suposta concesión.
3º.- En calquera caso, a noticia deixa claro que no goberno da Xunta de Galicia e no PP non existe vontade política para eliminar o complexo da nosa Ría, e que hoxe máis que nunca é necesaria unha forte mobilización social que impida a volta atrás nun proceso que ten ganado a maioría social coa súa loita e que debera ter o seu fin con anterioridade ao 2018.
Esta noticia é unha razón máis para nos mobilizar en contra da permanencia de ENCE-ELNOSA na nosa Ría; neste sentido, desde a nosa asociación facemos un chamamento a non baixar os brazos e participar activamente na Marcha contra CELULOSAS do 5 de xuño.
Pontevedra, 22 de maio de 2010
Pola Xunta Directiva,
Asdo.: Antón Masa, presidente.