Esta nova associaçom cultural organiza a primeira ediçom do Festival pola recuperaçom do património cultural, que terá lugar amanhá, sábado dia 7 de agosto, no monte da Siradelha, um marco incomparável polo que passarám até sete bandas galegas de diferentes estilos como Analogic, Avante!, Bulldozers, Frakaso Skolar, Grove Hustla, John Deeres e Mala Ratxa.
A festa, que terá entrada gratuita, principiará por volta das 21h30 horas, sendo estimada a sua finalizaçom para as 5h00. No recinto foi já habilitada umha zona de aparcamento, um posto de venda de comida e bebida, assim como um para a venda de diferentes produtos para angariar fundos. Isto tudo, a preços populares.
A associaçom, que nasceu a princípios deste ano da mao dum pequeno número de moços e moças, conta já com mais de meio cento de sócios e sócias que organizam e participam em diversas actividades culturais relacionadas com a protecçom do entorno natural.
Os grupos:
Oferecemos a seguir a informaçom sobre as bandas, tirada da página web 'todogrove.com'.
ANALOGIC (Rock progressivo / Ogrobe)
Quarteto formado no ano 2007 na vila ogrobense, e que após vários cámbios de formaçom, actualmente está integrado por David ao baixo, Jaime à guitarra, Trigo à bateria e Anxo como vocalista. Uns anos depois do seu nascimento, esta agrupaçom plasmou num primeiro EP, gravado nos estúdios Sonidina de Ogrobe, a sua aposta polo rock progressivo e experimental na que defendem temas complexos e melódicos com letras que reflectem sobre a natureza humana. Neste 2010, Analogic volveu entrar no estúdio para gravar umha segunda fita-demo, que já está praticamente finalizada.
www.myspace.com/analogicband
AVANTE! (Rock da Galiza / Loureda)
Projecto musical nascido Vale de Loureda, comarca da Corunha, da mao de Diego Bernal (guitarra rítmica) e Alberto Pombo (guitarra solista e voz), ambos sócios da Associaçom Galega da Língua (AGAL) e que posteriormente seria completado com a chegada de Rubém Nunes 'Kako' (Baixo) e Iago F. Vidal (bateria). Este quarteto que postula umha firme defesa do reintegracionismo lingüístico, tem no rock da banda irlandesa Thin Lizzy a sua principal influencia.
Logo de se juntarem a finais de 2009 e debutar sobre os cenários no passado mes de abril, Avante! apresentou recentemente a sua primeira gravaçom Galiza metal que foi confeccionada a começos de 2010 nos estudos Visue de Arteijo. Nestes seus primeiros passos, também venhem de ser nomeados finalistas do certame musical A Corunha Som, depois de que as composiçons que apresentáron foram as mais votadas polos internautas. Por outra parte, também fôrom o grupo mais apoiado na votaçom popular do concurso Cantalíngua, e acabam de apresentar o seu novo tema Todo termina mal ao certame Musicando a Carvalho Calero, que organizam a AGAL e o portal Komunicando.net.
www.myspace.com/avantegaliza
BULLDOZERS (Punk Rock / A Corunha)
Trio formado a meados do passado ano 2009 por Rodrigo (guitarra e voz), Dani (baixo e coros) e Jacobo (bateria) na cidade da Corunha. Recentemente plasmárom a sua contundente e enérgica proposta, na que o punk rock se combina com o hard rock mais clássico ou mesmo com o heavy em temas de pouco mais de dous minutos nos que nom há lugar para a calma, numha primeira fita-demo, gravada nos corunheses estúdios 'Treboada'.
www.myspace.com/bulldozersrockandroll
FRAKASO SKOLAR (Punk / A Guarda)
Sexteto de punk rock criado na Guarda no ano 2005, mercê à uniom dos membros de duas bandas locais, Esjarro e Kapatxo. Os guitarristas Dani e Carlos, o baixista Bruno, o baterista Isma e os vocalistas Chema e Iria apresentarám um directo protagonizado polas suas próprias composiçons, temas contundentes com letras em castelhano e galego, com o que já acudirom a duas ediçons do MorrazoRock e que neste ano 2010 pretendem trasladar ao estúdio, com o intuito de dar forma a umha primeira gravaçom que inicialmente estará composta por um total de dez temas.
www.myspace.com/frakasoskolarband
GROVE HUSTLA (Hip hop / Ogrobe)
Conformam junto com Analogic a representaçom vocal neste certame, e ponherám tambén a nota discordante num evento eminentemente rockeiro. Este grupo de rap foi criado no ano 2005 polos mc Djow, Darwing, Aka, X3, El Brother e o produtor XuryPro, e nesse mesmo ano apresentárom a sua primeira fita-demo: 13, à que sucedeu umha segunda em 2008. Desde esse momento venhem apresentando as suas composiçons em diferentes pontos da geografia galega.
www.myspace.com/grovehustla
JOHN DEERES (Rock / A Estrada)
Grupo de hard rock galego e em galego criado em 2007 polos integrantes da banda estradense disKordia, que decidírom confeccionar um novo projecto no que buscavam um som mais escuro, com claras influenzas da música dos anos setenta. Em directo, Os John Deeres apresentam um repertório próprio composto por temas de corte clássico, adubados com pinceladas de hard rock e algumha pinga psicadélica, e que completam com versons de grandes mitos do rock como Led Zeppelin, Black Sabbath ou Jimi Hendrix. Recentemente o grupo sofreu umha pequena pausa obrigado polo cámbio de vocalista, para retornar de seguido aos cenários depois dum ano 2009 no que percorrérom boa parte da geografia galega e actuárom em eventos como o Festigal, em Santiago de Compostela. Ao igual que os Avante!, os John Deeres fôrom outra das bandas declaradas finalistas do certame A Corunha Som.
www.myspace.com/osjohndeeres
MALA RATXA (Punk, hardcore / Marim)
Grupo de música punk e vocaçom "anticomercial", nascido nunmha garagem de Ardam, em Marim, com o único objectivo de se divertir tocando. Após vários cámbios na formaçom e um lustro de actividade, esta formaçom esta integrada actualmente por Rubén Villegas (guitarra), Sergio Martínez (baixo), Samuel Acuña (guitarra e voz), e Manuel (bateria). No passado ano 2009 apresentárom a sua primeira gravaçom Konsume o muere, um trabalho autogestionado que se pode descarregar gratuitamente da rede.
www.myspace.com/malaratxapunk
Dia: Sábado 7 de Agosto
Lugar: Monte da Siradelha, Ogrobe
Duraçom: de 21h30 a 05h00
Grupos: Analogic, Avante!, Bulldozers, Frakaso Skolar, Grove Hustla, John Deeres e Mala Ratxa
Organiza: AC A figheira do Meco
Entrada: Gratuita