O Foro Galego de Inmigración conformado por asociacións de migrantes, entidades e colectivos sociais, sindicatos e grupos políticos, e persoas a nivel individual, que ten como obxectivo fundamental a defensa dos dereitos das persoas migrantes en Galicia, quere amosar neste Comunicado a súa solidariedade co seu compañeiro Nicanor Alonso, defensor destacado dos dereitos das persoas migrantes na cidade de A Coruña e no conxunto de Galicia, que vai ser xulgado este martes día 8 de marzo por defender os dereitos de persoas e colectivos aos que se lles pretende desposuír dos mesmos.
Ao tempo denunciar a fonda inxustiza que se comete neste Acto e noutros similares que pretenden criminalizar a resposta social revindicativa de dereitos básicos, e convocar ao conxunto da cidadanía a unha rebelión masiva, contundente e pacífica fronte a este tipo de feitos.
"Consideramos intolerábel que se xulge ao noso compañeiro, destacado e coñecido activista social, que neste caso como en tantos outros, empregou a palabra, a través do seu megáfono, para defender dereitos básicos de persoas e colectivos aos que se pretende desposuír dos mesmos. Ese tipo de feitos, cerne de calquera sistema democrático, nembargantes acaban provocando responsabilidades administrativas – con importantes multas coas que pretenden amedrentarnos-, entre outros, para o noso exemplar compañeiro".
O Foro Galego de Inmigración promove e súmase a convocatoria de diferentes organizacións e colectivos sociais diante do edificio PROA (Matogrande) o Martes 8 de marzo ás 10:30 h, en apoio do compañeiro Nicanor Alonso. Queren convocar ao conxunto da cidadanía para que participe neste Acto de Apoio a este cidadán exemplar, republicano de honra, que non fixo, coma sempre, outra cousa que defender coa palabra os dereitos de todos e todas nós.