David Balsa Guldris nasceu na emigraçom suíça no 1969. Atualmente é presidente da Conferência Eurocentroamericana, sendo também ex-presidente das Juventudes Socialistas e da Executiva do PSdeG.Precisamente quando era presidente das Juventudes Socialistas acontecérom uns factos que ajudárom a catapultar a sua carreira política.
O artigo de Ramiro Vidal Alvarinho "A repressom sobre o independentismo galego" (Abrente nº 24) ajuda-nos a conhecer essa época, mediados da década de '90, quando o independentismo galego estava a se reformular, sobretudo por volta da criaçom da AMI. Esta nova organizaçom foi umha surpresa para o Estado espanhol, que asinha iniciou umha das mais famosas campanhas mediáticas de criminalizaçom do independentismo contemporâneo. A raíz dumha sabotagem a um caixeiro, o Subdelegaçom do Governo espanhol na Corunha inventou a existência dum misterioso Novo Exército Galego. Isto preparou o terreno para umha nova vaga repressiva, detendo em Outubro de 96 dous moços corunheses, aplicando-lhes a Lei Anti-terrorista e sendo enviados à Audiência Nacional desde onde fôrom encarcerados.
Servindo-se dos jornais, a onda criminalizadora aumentou, lançando especulaçons por volta da vinculaçom da AMI com Jarrai e mesmo com a ETA. "Incluso alguns políticos de segunda fileira -explica Ramiro Vidal- como o corrupto ex-dirigente das Juventudes Socialistas David Balsa nom desaproveitam o novo filom pra potenciar a sua imagem pública à costa da AMI: nom esqueçamos a cruzada que este indivíduo protagonizou contra a organizaçom juvenil com a ajuda inestimável de alguns meios de comunicaçom influentes como La Voz de Galicia ou a cadeia SER. Todo valia, incluso as NNGG do PP chegárom a acusar a AMI dos incêndios florestais".
A verdade é que David Balsa foi umha peça chave na estratégia repressiva de Diz Guedes. Em Outubro de 2005 apresentara umha denúncia no Julgado de Guarda na Corunha, assinada como "David Balsa. Secretário das Juventudes Socialistas" na que dizia que "Jarrai podría haber alentado a jóvenes gallegos de ideología nacionalista radical a cometer actos de sabotaje y acciones de carácter terroristas com la finalidad de trasplantar a Galicia un clima de crispación social y violencia como el que se padece en el País Vasco por culpa de la susodicha organización".
O delírio do agora presidente da Conferência Centroamericana nom tinha limites, e na denúncia podia-se ler que "Jarrai se dedica a financiar grupos de jóvenes radicales y a facilitarles tanto material gráfico, papeles o pegatinas como a darles sostén ideológico, facilitándoles documentos políticos en los que se aboga por el asesinato y la violencia callejera y se hace apología del terrorismo", e rematava indicando que Jarrai fora a indutora do inexistente "Novo Exército Galego". (ABC, 08/10/1995, pág. 23).
O artigo de Lupe Ces, "Nós, ETA, Espanha e o papanatismo" vai mais lá, e sinala a David Balsa como "portavoz da campanha desenhada polo sistema espanhol para amedrontar e reprimir a mocidade independentista, e o seu entorno familiar e social, murmurando a vozes o apoio dos moços e moças da AMI a um suposto comando de ETA. Ninguém chamou à direcçom do PSOE na Galiza para que figesse calar ao seu cachorro ou o deslegitimara; tampouco à imprensa que publicou as suas baboseiras se lhe premeu com campanhas de desprestígio, boicotagem ou falta de financiamento".
Está mui bem, claro, que o discurso reintegracionista se vaia expandindo, e mesmo que indivíduos como este pulem para que Compostela acolha no 2011 a cimeira de chefes de estado e de governo da CPLP, ou que a Galiza inaugure relaçons internacionais. De todo o mundo é sabido como funciona isto, e como gente que no seu dia perseguiu o único grupo político que defendia estas ideias, agora que começam a terem sucesso se sobe ao carro.Porém resulta escandaloso esta caso, onde um militante do PSOE declarado defensor do marco constitucional que nos nega como povo e os próprios relacionamentos internacionais que ele propom, que encabeçou a perseguiçom do independentismo, agora se erija em líder de nada. Tam pouca credibilidade tenhem os seus artigos pró-lusistas como as arrautadas de algumha declaraçom nesta linha de Manuel Fraga ou Feijoo, tam pouca credibilidade tem o seu discurso que nem a sua página pessoal davidbalsa.org, está em galego.
